जनकपुरधाम । प्रदेश २ का मुख्यमन्त्री लालबाबु राउतले भ्रष्टाचार हुँदा पनि केही गर्न नसक्ने अवस्था रहेको बताएका छन् ।
जनकपुरमा आयोजित कार्यक्रममा भ्रष्टाचार रोक्न आफैंबाट सुरुवात गर्नुपर्ने बताए ।सुशासनका कारण टाउकोमा हात राखेर रुनु पर्ने अवस्था आएको भन्दै राम्रो गर्नेहरुलाई बद्नाम गर्न माफियाहरु लागेको उनले गुनासो गरे ।
विधि प्रक्रिया झन्जिटिलो बनाएका कारण मानिसहरुले बरु केही रकम खर्च गरेर भएपनि काम गराउने गरेको उनको विश्लेषण छ । राज्यको स्रोतमा समेत डकैती भइरहेको भन्दै उनले भने, ‘हामी अहिले सबैभन्दा भ्रष्ट मुलुकहरुको सूचीमा छौं । कुशासन र अव्यवस्था छ ।’
भ्रष्टाचार रोकेर सुशासन कायम गर्न माथिबाटै सुरुवात गर्नुपर्ने उनले बताए । मुख्यमन्त्री राउत भन्छन्, ‘माथिबाट नियत सफल हुनुपर्छ । प्रदेशभित्र सुशासन कायम राख्न पहिले म आफैं स्वच्छ हुनुपर्छ । त्यसपछि मन्त्री, प्रशासनिक कर्मचारी आउँछ ।’
