काठमाडौं । प्रतिनिधि सभाको बैठकले रसुवाको भोटेकोशी–त्रिशूली नदीमा आएको विनाशकारी बाढीबाट भएको जनधनको क्षतिप्रति गहिरो दुःख व्यक्त गरेको छ।
बुधबार बसेको प्रतिनिधि सभाको बैठकमा विशेष प्रस्ताव प्रस्तुत गर्दै २०८३ साल भदौ १० गते आएको बाढीबाट रसुवाको टिमुरे, स्याफ्रुबेँसी, बेत्रावती, नुवाकोटको त्रिशूली बजार र देवीघाटलगायत धादिङ, चितवन तथा गोरखाका त्रिशूली नदी तटीय क्षेत्रमा ठूलो क्षति भएको उल्लेख गरिएको हो।
विशेष प्रस्तावमार्फत बाढीमा परी स्वदेशी तथा विदेशी नागरिक बेपत्ता हुनुका साथै ठूलो संख्यामा मानिसको मृत्यु भएको र व्यापक जनधनको क्षति भएको घटनाप्रति गहिरो दुःख व्यक्त गरिएको छ।
बैठकले बाढीबाट घरबारविहीन भएका नागरिकको उचित व्यवस्थापन गर्न तथा घाइतेहरूको शीघ्र स्वास्थ्यलाभको कामना गरेको छ। साथै, विपद्मा ज्यान गुमाउनेप्रति आत्माको चीरशान्तिको कामना गर्दै शोकसन्तप्त परिवारजनप्रति हार्दिक समवेदना व्यक्त गरिएको छ।
तस्बिरः गोपाल दाहाल/रासस
