काठमाडौं । अस्पतालले गलत रगत दिएका कारण ज्यान गुमाएकी ५ वर्षीया बालिका आकृतिकुमारीका बुवा रामप्रवेश साहले न्याय दिलाइदिन सरकारसँग माग गरेका छन् ।
यही वैशाख २३ गते गलत रगत दिएका कारण सर्लाही गौरैता नगरपालिका वडा नम्बर १०– सिसौटियाकी ५ वर्षीया बालिका आकृतिकुमारी साहले ज्यान गुमाएका थिए ।
बुवा रामप्रवेश साहले भने,‘हामी दिनहुँ न्याय खोज्दै विभिन्न सरकारी निकायहरुमा धाइरहेका छौं । तर, न्याय पाएका छैनौं । यसले हामीलाई अझै पीडा दिएको छ।’
शल्यक्रिया गर्नुपुर्व विरामीको दुवै मृगौला ठीक रहेको तर शल्यक्रियापछि दुवै मृगौला फेल भएको रिपोर्ट देखाईएको पनि सुनाए । उनले भने,‘शल्यक्रिया गरेलगत्तै मृगौला फेल भएको मेडिकल रिपोर्ट छ। हामीलाई यसमा पनि शंका लागेको छ । यसबारेमा सत्य–तथ्य छानबिन हुनुपर्छ ।’
स्वास्थ्य मन्त्रालय, जिल्ला प्रशासन कार्यालय, प्रहरी कार्यालय र सरकारी वकिलको कार्यालय पुग्दा समेत उजुरी दर्ता नभएको उनको गुनासो छ । ‘सत्यतथ्य छानबिनका लागि आज १० दिन भयो सरकारी कार्यालय धाउन थालेको । तर, अहिलेसम्म सरकारी कार्यालयबाट सहयोग भएको छैन’ उनले भने, ‘अब हामी कहाँ जाने ?’
उनले अघि भने, ‘मलाई इन्साफ चाहिएको छ तर, खुरुक्क शव लिएर जानू, बढी बोलिस भने नालामा फालिदिन्छु भनेर धम्की दिन्छन् ।
कार्यक्रममा बरिष्ठ अधिवक्ताद्धय डा। सुरेन्द्र भण्डारी र डा। नारायण घिमिरेले लापरवाही गर्नेलाई कारबाही गर्नुपर्ने माग गरेका छन् ।