काठमाडौं । आगामी महाधिवेशनपछि राजपा एकल अध्यक्ष प्रणालीमा जाने निश्चित भएको छ । राजपाको महाधिवेशन आगामी कात्तिकमा हुने भएको छ । राजपा अध्यक्षमण्डलको आइतबार काठमाडौंमा बसेको बैठकले पार्टीको विधान संशोधन गर्दै महाधिवेशनपछि अध्यक्षमण्डल भंग गरी एकल नेतृत्व प्रणाली अवलम्बन गर्ने निर्णय लिएको हो । ‘बैठकले विधान संशोधन गरेको छ’, अध्यक्षमण्डलका संयोजक शरत्सिंह भण्डारीले जानकारी दिए, ‘राजपाको एकीकरणपछि २ वर्षभित्र गर्ने एकता महाधिवेशनको समय बढाएर ३ वर्ष पुर्‍याएको छ ।’

२ वर्षअघि तत्कालीन मधेसी मोर्चामा आबद्ध ६ दल एकीकरण गरेर राजपा गठन भएको थियो । एकीकरणपछि राजपाको नेतृत्व ६ सदस्यीय अध्यक्षमण्डलले गर्दै आएको छ । आइतबारको बैठकले विधान संशोधन गरेपछि राजपाले त्यसको जानकारी निर्वाचन आयोगलाई समेत दिएको छ । महासचिव केशव झाले आइतबार नै आयोगलाई निर्णय बुझाइएको बताए ।

यसअघि पटक पटक पार्टी विधान बनाउन समिति गठन हुँदा पार्टी एकल अध्यक्ष प्रणालीमा जाने कि अध्यक्षमण्डल प्रणालीमा जानेमा विवाद हुँदै आएको थियो । पछिल्लो पटक गत वैशाख दोस्रो साता बसेको राजपा पदाधिकारी बैठकले लक्ष्मणलाल कर्णको नेतृत्वमा फेरि विधान समिति बनाएको थियो । यस पटक कर्ण नेतृत्वको समितिले पार्टीको मूल नेतृत्व एकल अध्यक्ष प्रणालीमा जाने वा अध्यक्षमण्डल कायम राख्ने टुंग्याउन माग गरेका थिए । बैठकले यसको टुंगो लगाएपछि विधान समितिले एक÷दुई दिनमै पार्टीको महाधिवेशनमा पेस हुने नयाँ विधान तयार हुने जनाएका छन् ।

समिति सदस्यसमेत रहेका महासचिव झाले मंगलबारसम्म विधान समितिको अन्तिम बैठक बस्ने तयारी भइरहेको बताए । एकल अध्यक्ष प्रणालीमा जाने निर्णयपछि विधान समितिले पार्टीको केन्द्रीय समितिको पदाधिकारी मोडलसहित अन्य कुराको टुंगो लाग्नेछ । त्यसका साथै पार्टीका पदाधिकारीसहित अन्य समितिको समेत टुंगो नयाँ विधानले लगाउनेछ । गत वैशाखमै महाधिवेशन गर्ने घोषणा यसअघि गरे पनि राजपाले तयारी नपुगेको भन्दै आउँदो कात्तिक २८–३० को मिति तय गरेका थिए । बैठकले महन्थ ठाकुरको संयोजकत्वमा महाधिवेशन मूल तयारी समितिसमेत गठन गरेको छ ।

मंसिरदेखि नै महाधिवेशन लक्षित गरी पार्टीको सदस्यता वितरण अभियान चलाए पनि आन्तरिक विवादका कारण पटक पटक समय थपिँदै आएको छ । केन्द्रमा समेत अध्यक्षमण्डलभित्रै विवाद देखिएपछि पार्टी पछिल्लो समय अन्योलग्रस्त बन्न पुगेको थियो । मंसिरमा अध्यक्षमण्डलको बहुमतबाट महन्थ ठाकुरको एकल संयोजन विस्थापन गरी चक्रीय प्रणालीमा जाने निर्णय भएपछि राजपामा विवाद उब्जेको थियो । चक्रीय प्रणालीमा गएपछि राजेन्द्र महतो, महेन्द्र यादव र भण्डारीले पार्टी संयोजकको भूमिका निर्वाह गरिसकेका छन् । सोमबारदेखि राजपाको संयोजकको जिम्मा अनिल झाले लिने आइतबार राजपाद्वारा जारी विज्ञप्तिमा उल्लेख छ । अन्नपूर्णबाट ।