काठमाडौं । प्रधानमन्त्री केपी शर्मा ओलीले आफू भारतीय प्रधानमन्त्री नरेन्द्र मोदीसँग मिलेर काम गर्न तत्पर रहेको बताएका छन् ।
२०७२ सालको भूकम्पको चपेटमा परेको बेला भारतले लगाएको नाकाबन्दीमा छिमेकीसँग नझुक्ने राष्ट्रवादी नेताको पहिचहान बनाएका ओलीले आज सामाजिक संजालमा एक टुइट गर्दै आफू मिलेर काम गर्ने बताएका हुन् ।
‘लोकसभा निर्वाचनमा उत्साहजनक नतिजा हासिल भएकोमा म प्रधानमन्त्री नरेन्द्र मोदीलाई हार्दिक बधाई दिन चाहन्छु’, ओलीले ट्वीटमा भनेका छन्, ‘पूर्ण सफलताका साथै आगामी दिनमा तपाईँसँग मिलेर काम गर्न तत्पर छु ।’
अहिलेसम्म मोदी ३ लाख ४७ हजार ९ सय सात मत प्राप्त गरेका छन् भने समाजवादी पार्टीका शलिनी यादव १ लाख ६ हजार मतले पछ्याइरहेका छन् । यता राष्ट्रिय काँग्रेसका अजय राय ७० हजार १ सय ५ मत प्राप्त गरेका छन् ।
बिहान ८ बजेबाट सुरु भएको मतगणनामा मोदीको दल भारतीय जनता पार्टीले अग्रता लिइरहेको छ । प्रारम्भिक मत गणनामा भाजपा एक्लै २९१ सिटमा अगाडि छ । प्रमुख प्रतिपक्षी कांग्रेस नराम्ररी पछारिएकाे छ । उसले मात्रै ५१ सिटमा अग्रता लिएको छ ।
लोकसभाको कुल ५४३ सिटमध्ये बहुमतका लागि २७२ सिट चाहिन्छ । सन् २०१४ को चुनावमा भाजपाले २८२ सिट जितेको थियो । यसपटक उसले ३ सयकाे हाराहारीमा सिट प्राप्त गर्न सक्ने बताइएकाे छ ।
उत्तर प्रदेशमा एक सिटमा मात्र कांग्रेस अगाडि छ । कांग्रेस पूर्वअध्यक्ष सोनिया गान्धी परम्परागत क्षेत्र रायबरेलीमा अग्रता कायमै राखेकी छन् । सोनियाका छोरा एवम् कांग्रेसका वर्तमान अध्यक्ष राहुल गान्धी भने अमेठीमा भाजपाकी नेतृ स्मृति इरानीभन्दा पछि परेका छन् ।
हालसम्मको नतिजा हेर्दा प्रधानमन्त्री मोदी पुनः शक्तिमा आउने देखिएको छ ।
