नयाँदिल्लीः भारतीय प्रधानमन्त्री नरेन्द्र मोदीका अति नजिकका विश्वासपात्र तथा आर्थिक सल्लाहकार अर्थमन्त्री अरुण जेट्लीले कमजोर स्वास्थ्यका कारण नयाँ मन्त्रिमण्डलमा काम गर्न नसक्ने घोषणा गरेका छन् ।
अर्थमन्त्री जेट्ली लामो समयदेखि मृगौलाको रोगबाट पीडित हुनुका साथै उहाँको गत वर्ष मे महिनामा मृगौला प्रत्यारोपण पनि गरिएको थियो । गत फेब्रुअरीमा संयुक्तराज्य अमेरिकामा स्वास्थ्य परीक्षण गर्दा उनमा क्यान्सरको समेत समस्या देखिएको थियो ।
६६ वर्षीय जेट्लीले प्रधानमन्त्री मोदीलाई लेखेको पत्रमा आफू नयाँ मन्त्रिपरिषदमा रहेर सेवा गर्न असमर्थ रहेको बताएका छन् । उनले आफू आफ्नो स्वास्थ्य र उपचारमा केन्द्रित गर्न चाहेको उल्लेख गरेका छन् । मन्त्री जेट्लीले आफ्नो पत्र ट्वीटर मार्फत सार्वजनिक गरेका थिए ।
जेट्लीले प्रधानमन्त्री मोदीको नेतृत्वमा भारतीय जनता पार्टीले आश्चर्यजनक विजय हासिल गरेकोमा मोदीलाई धन्यवाद पनि दिनुभएको छ ।
जेट्लीकै समयमा विवादास्पद नाेटबन्दी गरिएकाे थियाे । जसमा भारतमा चलनचल्तीमा रहेका ५०० र १००० का नाेटमाथि प्रतिबन्ध लगाइएकाे थियाे । यस निर्णयकाे चर्काे अालाेचना भएपनि त्यसबाट भाजपालाइ नै राजनीतिक फाइदा पुगेकाे अनुमान गरिएकाे छ ।
नाेटबन्दीका कारण नेपालमा रहेका ५०० र १००० का नाेट सटही हुन सकेकाे छैन । नेपाल सरकारले उक्त विषयमा भारतीय पक्षसँग निरन्तर वार्ता गरेपनि नेपालमा यी नाेट राष्ट्रबैंकमा थन्किएका छन् ।
भाजपाले गत निर्वाचनमा लोकसभाका ५४२ मध्ये ३०३ स्थानमा जितेको थियो । जितसँगै मोदी दोस्रो कार्यकालका लागि राष्ट्रपति रामनाथ कोबिन्दबाट नियुक्त भइसक्नु भएको छ ।
मोदीले बिहीबार राष्ट्रपति समक्ष सपथ लिने कार्यक्रम तय भएको छ । उक्त सपथ कार्यक्रममा नेपालबाट प्रधानमन्त्री केपी शर्मा ओली पनि सहभागी हुने कार्यक्रम छ । सपथमा छिमेकी मुलुक पाकिस्तानका प्रधानमन्त्री इमरान खानलाई भने निमन्त्रण गरिएको छैन ।
प्रधानमन्त्री नरेन्द्र मोदीले बिमस्टेकका सदस्य मुलुकका अन्य नेताहरुलाई पनि आमन्त्रण गर्नुभएको छ ।
जेट्लीको स्थानमा भाजपाका अध्यक्ष अमित शाह र रेलमन्त्री पियुस गोयलमध्ये एक अर्थमन्त्री हुने सम्भावना छ ।
