काठमाडौं । भारतका लागि नेपाली राजदूत नीलाम्बर आचार्यले भारतको राजनीतिक तहले नेपाललाई उच्च प्राथमिकतामा राखेको र दुई देशका सबै मुद्दामा छलफल भइरहेको बताएका छन् । नेपालका समस्या र सम्बन्धका प्राथमिकताबारे विदेशमन्त्री एस। जयशंकरसँग तीन दिनअघि खुलेर कुराकानी गरेको र नेपाली दिमागमा उठेका सबै प्रश्नरविषयमा छलफल भएको आचार्यले जानकारी दिए ।
नेपाल–भारत डुबान, सीमा समस्यालगायत सबै विषयमा भारतीय राजनीतिक तहले चासो दिएर छलफल गरेको आचार्यको भनाइ छ । नरेन्द्र मोदी नेतृत्वको दोस्रो सरकारले नेपालसँग राजनीतिक तहबाट भन्दा कर्मचारीतन्त्रबाट सम्बन्ध सञ्चालन गर्न खोजेको भन्दै आलोचना भइरहँदा आचार्यले यस्तो टिप्पणी गरेका हुन् ।
‘भारतका विदेशमन्त्री एस। जयशंकरसँग मेरो शिष्टाचार भेट थियो । तर, भेट शिष्टाचारमा सीमित भएन, नेपाल–भारत सम्बन्धमा द्विपक्षीय वार्ताजस्तै भयो,’ १० साउनमा साउथ ब्लकमा विदेशमन्त्रीसँग भएको भेटबारे आचार्यले दिल्लीबाट टेलिफोनमा भने । राजदूत आचार्यले दिल्लीमा विदेश सचिव विजय केशव गोखलेसँग एक महिनाअघि भेटेका थिए भने तीन दिनअघि विदेशमन्त्री जयशंकरसँग भेटेका छन् ।
विदेश सचिवबाट अवकाश पाएर विदेशमन्त्री भएका जयशंकरसँगको भेट ‘राजनीतिक’ भएको अथ्र्याएका राजदूत आचार्यले त्यसअघि पनि अनौपचारिक भेट भएको बताए । ‘त्यो पहिलो औपचारिक भेट हो, तर अनौपचारिक रूपमा पहिलो भेट होइन,’ आचार्यले भने, ‘नेपालका अप्ठ्यारा–सफ्ठ्यारा सबै कुराकानी भए । नेपाली दिमागमा उठेका सबै कुरा मैले गरेको छु । महत्वपूर्ण र राम्रो छलफल भयो ।’
बाढी, डुबानजस्ता विषयमा पछिल्लोपटक भारतको राजनीतिक तहसँग नेपालको छलफल हुन नसकेको टिप्पणीबारे राजदूत आचार्यले भने, ‘यी सबै विषयमा छलफल भएको छ । नेपालको चासो र चिन्ता राखिएको छ । विस्तृतमा भन्न चाहन्नँ, तर नेपालीलाई परेका अप्ठ्याराका सबै पक्ष मैले राखेको छु । परिणामका लागि प्रतीक्षा गरौँ ।’
आदित्यनाथको पशुपतिनाथ र मुक्तिनाथ भ्रमण गर्ने इच्छा
नेपालको सीमावर्ती उत्तरप्रदेशका मुख्यमन्त्री योगी आदित्यनाथले पशुपतिनाथ र मुक्तिनाथ भ्रमणमा आउने इच्छा राखेका छन् । राजदूत आचार्यसँग ८ साउनमा लखनउमा भएको कुराकानीका क्रममा आदित्यनाथले सीमावर्ती बाँध र भारतीय सुरक्षाकर्मीबाट नेपाली नागरिकलाई सिमानामा हुने भनिएको दुव्र्यवहारबारे प्रदेश र केन्द्र सरकार गम्भीर रहेको पनि उल्लेख गरेका छन् ।
‘योगी आदित्यनाथजीसँग निकै लामो र खुला छलफल भयो,’ आचार्यले भने, ‘उहाँले प्रदेशका सबै अधिकारी राखेर नेपालको चासो सुन्नुभयो ।’ आचार्यले यही बीचमा हरियाणा र पञ्जाबका मुख्यमन्त्री एवं गभर्नरसँग भेटवार्ता गरेका थिए । चार महिनापछि हरियाणाको कुरुक्षेत्रमा आयोजना हुने गीता जयन्तीका लागि नेपाललाई निमन्त्रणा आएको पनि उनको भनाइ थियो ।
राजदूत आचार्यले सीमावर्ती राज्य उत्तरप्रदेशबाहेक सिक्किमका मुख्यमन्त्री प्रेमसिंह तामाङ ९गोले०, पश्चिम बंगालका गभर्नर केशरीनाथ त्रिपाठीसँग भेट गरेका छन् । पश्चिम बंगालकी मुख्यमन्त्री ममता बनर्जीले व्यस्तता देखाउँदै राजदूत आचार्यसँग भेट्न मानिनन् । ‘अब बिहारका मुख्यमन्त्रीसँग भेटको प्रयास गर्दै छु,’ आचार्यले भने, ‘एकचरण सीमावर्ती राज्यका मुख्यमन्त्रीसहित सरकारसँग भेटेर द्विपक्षीय चासो र सरोकारका विषयमा छलफल गर्छु । त्यसपछि दिल्लीमा राजनीतिक तहमा भेटवार्ता गर्छु ।’, समाचार नयाँ पत्रिका दैनिकमा प्रकाशित छ ।
