काठमाडौं । अज्ञात समूहले मकवानपुरमा एनसेलका दुईवटा टावरमा आगजनी गरेका छन् । जिल्ला प्रहरी कार्यालयका अनुसार बुधबार राति अज्ञात समूहले टावरमा अगजनी गरेका हुन् । मकवानपुरको उत्तरी क्षेत्रमा पर्ने थाहा नगरपालिका–३ शिखरकोट र इन्द्रसरोवर गाउँपालिका–३ सिस्नेरी खत्रीडाँडामा रहेको टावरमा आगजनी गरेको एसपी मुकेशकुमार सिंहले जानकारी दिए ।
यसैबीच म्याग्दीको बेनी नगरपालिका–२ ज्यामरुकोटमा रहेको एनसेल टावरमा पनि आगजनी भएको छ । बुधवार राति करिब पौने ११ बजे विस्फोटको आवाज आएसँगै टावरमा आगजनी भएको थियो ।
नुवाकोटमा पनि आगजनी
नुवाकोटको बेलकोटगढीमा रहेको एनसेलको टावरमा नचिनेका समूहले आगजनी गरेको छ । बुधबार राति बेलकोटगढी नगरपालिका वडा नं। ४ पेटारेमा रहेको एनसेल टावरमा आगजनी गरेको हो । बिहीबार बिहान स्थानीयले नचिनेका मानिसले आगजनी गरेको प्रहरीलाई खबर गरेपछि प्रहरी घटनास्थल पुगेको थियो ।
दैलेखमा पनि आगजनी
विप्लव माओवादीनिकटका कार्यकर्ताले दैलेखको गुराँस गाउँपालिका–५ को जंगलमा रहेको एनसेल टावरमा क्षति पुर्याएका छन् । दाउरा संकलन गरेर आगो लगाएको भए पनि आगो भने लाग्न नभ्याएको प्रहरीले जनाएको छ । टावरसँगै रहेको सोलार प्यानलमा भने क्षति पुगेको छ ।
रामेछापमा आगजनी प्रयास
प्रतिबन्धित विप्लव समूहका कार्यकर्ताहरूले बिहीबार बिहान जिल्लाको दोरम्बा गाउँपालिका–१ डाँडाकटेरीको एनसेल टावरमा आक्रमणको प्रयास गरेका छन् । बिहान करिब ११ बजेको समयमा उक्त टावरलाई लक्षित गरी दुई–तीनजनाको संख्यामा आएका माओवादीका कार्यकर्ताले टावर छेकेको तारजालीभित्र प्रवेश गरी आक्रमणको प्रयास गरेका थिए । सो क्रममा उनीहरूले जुटको बोरामा लगेको बम विस्फोट गराएको जिल्ला प्रहरी कार्यालय रामेछापका प्रवक्ता शेख अदालतले जानकारी दिए । घटनापछि जिल्ला सुरक्षा समितिको बैठकले सबै एनसेलका टावरमा सशस्त्र प्रहरी खटाउने निर्णय गरेको प्रजिअ लीलाकुमारी पाण्डेले जानकारी दिइन् ।
बाग्लुङ, गोरखा र तनहुँका टावरमा क्षति
बाग्लुङ निसीखोला गाउँपालिका–७ राजकुटस्थित एनसेलको टावरमा आगजनी भएको छ । बुधबार राति करिब ९ बजेतिर अज्ञात समूहले टावरमा आगजनी गरेको जिल्ला प्रहरी कार्यालय बाग्लुङले जनाएको छ । आगलागीबाट सिस्टम र टावरमा जडान भएका तारहरू जलेर नष्ट भएको प्रहरीले जनाएको छ । आगजनीपछि पश्चिम बाग्लुङको निसीखोला, ढोरपाटन, तमानखोला, गुल्मी, प्युठान, रुकुम र रोल्पाका केही भागमा मोबाइल सेवा अवरुद्ध भएको छ ।
गोरखाको पालुङटार नगरपालिका–८ धुवाकोटमा रहेको ऐनसेल टावरमा पनि आगजनी भएको छ । जिल्ला प्रहरी कार्यालयका अनुसार बुधबार राति ११ बजेतिर टावरमा आगजनी भएको हो । तनहुँको घिरिङ गाउँपालिका–२ स्थित घोर्लीछापमा रहेको एनसेलको टावरमा पनि अज्ञात समूहले आगजनी गरेको छ । सुदूरपश्चिम प्रदेशका डोटी, डडेल्धुरा, अछाम र कैलालीका ८ टावरमा आगजनी गरिएको छ ।, समाचा नयाँ पत्रिका दैनिकमा प्रकाशित छ ।
