ढाका । बंगलादेशको राजधानी ढाकास्थित अन्तर्राष्ट्रिय विमानस्थलबाट दुई जापानी नागरिकलाई १२ किलोग्राम सुनसहित पक्राउ गरिएको विमानस्थलका अधिकारीले बताएका छन्।मलेशियाबाट बंगलादेश पुगेका दुई जापानी नागरिकलाई उक्त सुनसहित बिहीवार पक्राउ गरिएको हो।
बंगलादेश राजस्व अनुसन्धान निर्देशनालयका उपनिर्देशक पायल पाशाले सिन्ह्वासँग भने, ‘राजस्व विभागले उनीहरूले सुनसहित प्रवेश गर्दै गरेको भन्ने गोप्य सूचनाका आधारमा उनीहरूलाई पक्राउ गरेको हो।’
उनीहरूसँगबाट जफत गरिएको १२ किलोग्राम (३० थान सुनका टुक्रा) को मूल्य बिहीवारको बजार मूल्यअनुसार ६ करोड बंगलादेशी टाका (सात लाख १४ हजार अमेरिकी डलर बराबर) रहेको उप निर्देशक पाशाले बताए।
‘जापानी नागरिकले हजरात शाहजलाल अन्तर्राष्ट्रिय विमानस्थलको प्रवेशद्वार पार गर्ने क्रममा पाइन्टको खल्तीमा लुकाइराखेको अवस्थामा उक्त सुन जफत गरिएको छ’, उनले भने। भन्सारले उनीहरूलाई बंगलादेशी प्रहरीको जिम्मा लगाइसकेको बताएको छ।
स्रोतका अनुसार विदेशी सुन तस्करसँग मिलेर बंगलादेशी आपराधिक गिरोहले गैरकानूनी रूपमा ठूलो मात्रामा सुन, विदेशी मुद्रा, लागू औषध तथा प्रतिबन्धित औषधि भित्र्याउने गर्छन्।
