चितवन । पत्रकार सालिकराम पुडासैनीको आत्महत्या प्रकरणमा पक्राउ परेका टेलिभिजन प्रस्तोता रवि लामिछानेसहित तीन जनालाई आज (मंगलबार) जिल्ला अदालत चितवनमा पेश गरिएको छ । लामिछानेसहित युवराज कँडेल र अस्मिता कार्की अहिले चितवन प्रहरीको हिरासतमा रहेका छन् । चितवनको सुरक्षा व्यवस्था भने कडा पारिएको छ ।
लामिछानेका समर्थकहरुको प्रदर्शन हिंसात्मक बन्दै गएपछि प्रहरीले अन्य जिल्लाबाट समेत सुरक्षाकर्मी परिचालन गरेर सुरक्षा व्यवस्थालाई कडा पारेको छ । जिल्ला प्रहरी कार्यालयमा रहेका उनीहरुलाई थप अनुसन्धानका लागि म्याद थप गर्ने गरी अदालत लगिएको चितवनका प्रहरी उपरीक्षक दानबहादुर मल्लले जानकारी दिए ।
यसअघि हिजोदेखि नै लागू हुने गरि जिल्ला प्रशासन कार्यालय चितवनले चौबिसकोठीदेखि मालपोतचोकसम्म निषेधित क्षेत्र घोषणा गरिसकेको छ । अदालतले थपेको पाँच दिनको हिजो अन्तिम दिन भएकाले तीनै जनाको बयान लिइएको हो ।
यता, नेपाल कम्युनिष्ट पार्टी (नेकपा) चितवनले रबि लामिछानेको समर्थनमा भईरहेको प्रर्दशनमा नजान आफना नेता तथा कार्यकर्तालाई निर्देशन दिएको छ ।
