रौतहट । रौतहटको निजगढस्थित लालबकैया नदीमाथि निर्माणाधीन पुल लामो समयको अन्योल र ढिलाइपछि सञ्चालनमा आउने चरणमा पुगेको छ। पुलका सबै ६ वटा स्पान निर्माण सम्पन्न हुनुका साथै फुटपाथ, रेलिङ र एक्सपान्सन जोइन्टको कामसमेत सकिएको पूर्वाधार विकासमन्त्री सुनिल लम्सालले जानकारी दिएका छन्।
मन्त्री लम्सालका अनुसार तीन वर्षभित्र निर्माण सम्पन्न गर्ने लक्ष्यसहित २०७१ सालमा ठेक्का सम्झौता भएको उक्त पुल पटक–पटक म्याद थप्दा पनि पूरा हुन सकेको थिएन। निर्माणमा ढिलाइ भएपछि सम्बन्धित निर्माण कम्पनीलाई कालोसूचीमा राखेर बाँकी कामका लागि २०७९ सालमा पुनः ठेक्का आह्वान गरिएको थियो।
तर, नयाँ ठेक्का सम्झौता भएको एक वर्षसम्म पनि निर्माण कार्य अघि बढ्न सकेन। पुरानो ठेक्काअन्तर्गत निर्माण गरिएको पुलको तल्लो संरचनाको जिम्मेवारी स्पष्ट नहुनु र पर्याप्त बजेट विनियोजन नहुनु ढिलाइका प्रमुख कारण रहेको मन्त्री लम्सालले बताए।
समस्या पहिचान गरेपछि डिभिजन कार्यालयमार्फत पुरानो निर्माण कार्यको जिम्मेवारी स्पष्ट पारिएको र आवश्यक बजेटको पूर्ण व्यवस्था गरेर निर्माणलाई गति दिइएको उनको भनाइ छ।
हाल पुलका मुख्य संरचनासहित फुटपाथ, रेलिङ र एक्सपान्सन जोइन्टको काम सम्पन्न भइसकेको छ। पुलसम्म पुग्ने पहुँच सडक र नदी नियन्त्रण तथा धार व्यवस्थापनसम्बन्धी काम भने जारी रहेको मन्त्री लम्सालले जानकारी दिए।
लामो समयदेखि अलपत्र अवस्थामा रहेको पुल निर्माण सम्पन्न भएपछि स्थानीय बासिन्दाको आवागमन सहज हुने र क्षेत्रीय यातायातमा सुधार आउने अपेक्षा गरिएको छ। पहुँच सडक र नदी व्यवस्थापनको कामसमेत पूरा भएपछि पुल सञ्चालनमा ल्याउन सहज हुने विश्वास गरिएको छ।
