काठमाडौं । राष्ट्रिय लोक तथा दोहोरी गीत प्रतिष्ठान नेपालको अध्यक्षमा चर्चित लोकदोहोरी गायक पशुपति शर्मा निर्विरोध निर्वाचित भएका छन्।
महोत्तरीको बर्दिबासमा बिहीबारदेखि जारी प्रतिष्ठानको ९औँ केन्द्रीय महाधिवेशनअन्तर्गत शुक्रबार शर्मा अध्यक्षमा निर्विरोध निर्वाचित भएका हुन्। अध्यक्ष पदमा शर्माको मात्रै उम्मेदवारी परेपछि उनी निर्विरोध चयन भएका हुन्।
यसैगरी, वरिष्ठ उपाध्यक्षमा दीपक खड्का, प्रथम उपाध्यक्षमा सुवास केसी, द्वितीय उपाध्यक्षमा राजु ढकाल र महासचिवमा शिव हमाल निर्विरोध निर्वाचित भएका छन्।
त्यस्तै, कोषाध्यक्षमा जुना श्रीष मगर र सहकोषाध्यक्षमा सम्झना भण्डारी निर्विरोध चयन भएका छन्।
प्रतिष्ठानको नयाँ नेतृत्व चयनका लागि जारी महाधिवेशनमा विभिन्न पदमा उम्मेदवारी परेको थियो। निर्विरोध निर्वाचित पदाधिकारीहरूले प्रतिष्ठानको संस्थागत विकास, लोक तथा दोहोरी गीतको संरक्षण र प्रवर्द्धनमा भूमिका खेल्ने अपेक्षा गरिएको छ।
