पोखरा । पोखरा महानगरपालिका–२८ शान्ति मैदानस्थित कालिका बोर्डिङ स्कुलको बस दुर्घटनामा घाइते भएकाहरूको पोखरा स्वास्थ्य विज्ञान प्रतिष्ठानअन्तर्गत पश्चिमाञ्चल क्षेत्रीय अस्पतालमा उपचार भइरहेको छ। अस्पतालले असोज २३ गते सार्वजनिक गरेको विवरणअनुसार दुर्घटनामा घाइते भई अस्पताल ल्याइएकामध्ये एक जनाको सघन उपचार कक्ष (आईसीयू) मा उपचार भइरहेको छ।
अस्पताल प्रशासनका अनुसार अस्मी कँडेललाई आईसीयूमा राखेर उपचार भइरहेको छ। दुर्घटनामा घाइते भएका अन्य विद्यार्थी तथा व्यक्तिहरूको पनि अस्पतालमा उपचार भइरहेको विज्ञप्तिमा उल्लेख छ।
अस्पतालले सार्वजनिक गरेको विवरणमा विभिन्न उमेरका विद्यार्थी तथा अन्य व्यक्तिहरू घाइते भई उपचारका लागि ल्याइएको जनाइएको छ। दुर्घटनामा ज्यान गुमाएका व्यक्तिहरूलाई मृत अवस्थामा अस्पताल ल्याइएको पनि विज्ञप्तिमा उल्लेख छ।
पोखरा स्वास्थ्य विज्ञान प्रतिष्ठानले दुर्घटनामा घाइते भएका सबैको शीघ्र स्वास्थ्यलाभको कामना गर्दै निधन भएकाहरूप्रति श्रद्धाञ्जली व्यक्त गरेको छ। साथै, शोकसन्तप्त परिवारजनप्रति समवेदना प्रकट गरेको छ।
