काठमाडौं । काठमाडौं महानगरपालिकाले प्राचीन सांस्कृतिक परम्परा ‘सम्यक महादान’ को संरक्षण, प्रवर्द्धन र पुस्तान्तरणका लागि विशेष कार्ययोजना अघि सारेको छ ।
महानगरपालिकाकी कार्यवाहक प्रमुख सुनिता डंगोलले भौतिक सम्पदाको पुनर्निर्माणसँगै त्यससँग जोडिएका अमूर्त सांस्कृतिक परम्परालाई पनि जीवन्त राख्नुपर्ने बताउनुभएको छ । उहाँले सम्यक महादानलाई पुनर्जीवित गर्दै यसको संरक्षण र निरन्तरताका लागि महानगरले नीतिगत तथा व्यावहारिक नेतृत्व गर्ने जानकारी दिनुभयो ।
डंगोलका अनुसार महानगरपालिकाले हालसम्म विभिन्न भौतिक सम्पदा, मठमन्दिर तथा ऐतिहासिक संरचनाको पुनर्निर्माण गरेको छ । तर, ती संरचनाको वास्तविक महत्त्व कायम राख्न तिनसँग जोडिएका संस्कार, परम्परा र सांस्कृतिक अभ्यासको निरन्तरता आवश्यक रहेको उहाँको भनाइ छ ।
सम्यक महादान कार्यक्रमलाई व्यवस्थित र भव्य रूपमा सञ्चालन गर्न महानगरपालिकाले ३०१ सदस्यीय मूल समारोह समिति गठन गरेको छ । समितिले सम्यक महादानको धार्मिक, ऐतिहासिक तथा सांस्कृतिक महत्त्व संरक्षण गर्दै कार्यक्रमलाई व्यवस्थित रूपमा अघि बढाउनेछ । यसका लागि महानगरपालिकाले सुरक्षा व्यवस्थापन, नीतिगत सहजीकरण र आर्थिक सहयोगलगायतका जिम्मेवारी निर्वाह गर्ने जनाएको छ ।
महानगरपालिकाले पछिल्लो समय लोपोन्मुख सांस्कृतिक परम्परालाई नयाँ पुस्तासँग जोड्ने प्रयाससमेत गर्दै आएको छ । मुहाली बाजाको परम्परा लोप हुने अवस्थामा पुगेपछि स्थानीय युवाको सहकार्यमा त्यसलाई पुनर्जीवित गरिएको उदाहरण प्रस्तुत गर्दै डंगोलले सम्यक महादानलाई पनि युवा पुस्तामाझ परिचित गराउने र यसको निरन्तरता सुनिश्चित गर्ने लक्ष्य रहेको बताउनुभयो ।
यस अभियानअन्तर्गत विभिन्न उपसमिति गठन गरी कामसमेत सुरु गरिएको महानगरपालिकाले जनाएको छ । सम्यक महादानलाई व्यवस्थित, मर्यादित र परम्पराअनुरूप सञ्चालन गर्न सम्बन्धित समुदायका गुठियार, द्यः थुवा तथा स्थानीय बुद्धिजीवीसँग समन्वय गरिनेछ ।
महानगरपालिकाले सम्पदा संरक्षणलाई भौतिक संरचनाको निर्माण र पुनर्निर्माणमा मात्र सीमित नराखी त्यससँग जोडिएका मौलिक संस्कार, संस्कृति र परम्पराको निरन्तरतासँग जोड्नुपर्नेमा जोड दिएको छ । सम्यक महादानको संरक्षणमार्फत काठमाडौंको प्राचीन सांस्कृतिक पहिचानलाई भावी पुस्तासम्म हस्तान्तरण गर्ने महानगरको लक्ष्य रहेको छ ।
— न्युज एजेन्सी नेपाल
