काठमाडौं । सरकारले भ्रष्टाचारविरुद्धको संयुक्त राष्ट्रसंघीय महासन्धिका प्रावधान कार्यान्वयनको अवस्थाबारे क्रमशः सबै जिल्लामा अनुगमन तथा निरीक्षण गर्ने जनाएको छ ।
शुक्रबार सिंहदरबारस्थित प्रधानमन्त्री तथा मन्त्रिपरिषद्को कार्यालयमा आयोजित प्रेस ब्रिफिङमा कार्यालयका सहसचिव एवं प्रवक्ता हेमराज अर्यालले महासन्धि कार्यान्वयनको अवस्थाबारे दोलखा र रामेछापमा अनुगमन सम्पन्न गरिएको जानकारी दिनुभयो ।
उहाँका अनुसार सरकारले भ्रष्टाचारविरुद्धको महासन्धि कार्यान्वयनको अवस्था बुझ्न जिल्लास्तरमा अनुगमन गरिरहेको छ । आगामी दिनमा क्रमशः सबै जिल्लामा अनुगमन तथा निरीक्षण गरिने उहाँले बताउनुभयो ।
यसैगरी, सरकारले धनकुटा, सुनसरी र मोरङका कारागार तथा केही हिरासतमा रहेका कैदीबन्दी र थुनुवाको मानव अधिकार अवस्थाबारे पनि अनुगमन तथा निरीक्षण गरेको छ । निरीक्षणका क्रममा कैदीबन्दी तथा थुनुवाको मानव अधिकार सुनिश्चित गर्न सम्बन्धित निकायको ध्यानाकर्षण गराइएको प्रवक्ता अर्यालले जानकारी दिनुभयो ।
यसैबीच, सरकारले असोज २२ देखि २८ गतेसम्म सिंहदरबारस्थित सबै मन्त्रालय र मन्त्रालय परिसरमा सरसफाइ सप्ताह सञ्चालन गरेको छ । मन्त्रालयभित्र र परिसरमा सरसफाइलाई व्यवस्थित तथा प्रभावकारी बनाउने उद्देश्यले अभियान सञ्चालन गरिएको उहाँले बताउनुभयो ।
अभियानअन्तर्गत प्रत्येक मन्त्रालयमा सरसफाइसम्बन्धी कामको अनुगमन तथा निरीक्षण गर्न एक जना सम्पर्क व्यक्ति (फोकल पर्सन) तोकिएको छ । ती व्यक्तिमार्फत सरसफाइको अवस्था नियमित अनुगमन गरिने र भएका कामको विवरण प्रधानमन्त्री तथा मन्त्रिपरिषद्को कार्यालयमा पेस गर्न मन्त्रालयहरूलाई निर्देशन दिइएको अर्यालले बताउनुभयो ।
सरकारले नागरिकका गुनासा प्रभावकारी रूपमा सम्बोधन गर्नसमेत आवश्यक काम गरिरहेको उहाँको भनाइ छ ।
