काठमाडाैँ । नेपाली कांग्रेसका नेता शंकर तिवारीले पार्टीमा विशेष महाधिवेशनपछि पनि अपेक्षाअनुसार रुपान्तरण हुन नसकेको बताउँदै अब ‘रुपान्तरणको पनि रुपान्तरण’ आवश्यक रहेको बताएका छन्।
बुधबार काठमाडौंमा आयोजित पत्रकार सम्मेलनमा कांग्रेसको १५औँ महाधिवेशनमा महामन्त्री पदका उम्मेदवार तिवारीले विशेष महाधिवेशनपछि पार्टी ‘रनवेमा अड्किएको’ टिप्पणी गर्दै पूर्ण महाधिवेशनपछि कांग्रेसलाई नयाँ दिशामा अघि बढाउनुपर्ने बताए।
उनले पार्टी सभापतिलाई बलियो बनाउनुपर्नेमा जोड दिँदै सभापतिको हात बलियो बनाउनुको अर्थ व्यक्तिगत रूपमा साथ दिनु नभई सही नीति निर्माणमा सहयोग गर्ने र त्यसलाई कार्यकर्ता तथा जनतामाझ प्रभावकारी रूपमा पुर्याउनु भएको स्पष्ट पारे।
तिवारीले कांग्रेसका महाधिवेशन प्रतिनिधिमध्ये करिब ७० देखि ७२ प्रतिशत नयाँ प्रतिनिधि आएको र तीमध्ये बहुसंख्यक ४५ वर्षमुनिका रहेको बताए। बदलिँदो जनसांख्यिक अवस्थाअनुसार केन्द्रीय पदाधिकारीको नेतृत्वमा पनि युवा आवाज सुनिश्चित गर्नुपर्ने उनको भनाइ छ।
‘हामीले विशेष महाधिवेशनबाट रुपान्तरणको कुरा गर्यौँ, तर भनेअनुसार रुपान्तरण हुन सकेन । मेरो पहिलो एजेण्डा रुपान्तरणको पनि रुपान्तरण हो,’ उनले भने, ‘कांग्रेस पार्टी विशेष महाधिवेशन गरेर रनवेमा अड्किरहेको छ। अब १५औँ महाधिवेशनपछि पनि रनवेमा अड्किने अवस्था नआओस् भन्नेमा सचेत हुनुपर्छ।’
उनले सभापति गगन थापासँगै केन्द्रीय पदाधिकारीको बैठकमा सभापतिभन्दा कम उमेरका युवा नेतृत्व पनि सहभागी भएर सल्लाह र सुझाव दिन सक्ने वातावरण बनाउनुपर्ने बताए। वरिष्ठ नेताप्रति सम्मान कायम राख्दै केन्द्रीय पदाधिकारीको तहमा युवा आवाजको प्रतिनिधित्व आवश्यक रहेको उनले उल्लेख गरे।
तिवारीले आफूले महामन्त्री पदलाई पार्टी रुपान्तरणको ‘स्टेपिङ स्टोन’का रूपमा लिएको बताए। बीपी कोइरालाले आफ्ना कार्यक्रम आफैँ निर्माण गरी कार्यान्वयनमा लैजाने गरेको स्मरण गर्दै आफूले पनि पार्टीलाई नयाँ कार्यक्रम र नीतिका आधारमा अघि बढाउन चाहेको बताए।
कांग्रेसका महाधिवेशन प्रतिनिधिमा रहेको असन्तुष्टि र छटपटीलाई राजनीतिक एजेण्डा र गन्तव्य दिन आफूले महामन्त्रीमा उम्मेदवारी दिएको उनको भनाइ छ।
महामन्त्री पदको उम्मेदवारीबाट आफू कुनै हालतमा पछि नहट्ने स्पष्ट पार्दै तिवारीले देशभरका महाधिवेशन प्रतिनिधि तथा कार्यकर्ताको हौसलामा आफ्नै बलमा उम्मेदवारी दिएको बताए। आफू महामन्त्रीमा विजयी हुनेमा विश्वस्त रहेको उनको दाबी छ।
‘म मेरो दममा खडा भएको छु, देशभरिका कार्यकर्ता साथीहरूको दममा खडा भएको छु। म अन्तिमसम्म जंगमा रहन्छु र विजयी भएर आउनेछु। मैले फिर्ता गर्ने कुरा छैन,’ उनले भने।
कांग्रेसको इतिहासमा पदाधिकारीलाई दोहोर्याएर अवसर दिने अभ्यास नरहेको उल्लेख गर्दै तिवारीले आफू ‘अनटेस्टेड’ भएकाले नयाँ नेतृत्वलाई अवसर दिनुपर्ने बताए। उनले बीपी कोइरालाको पालाका कार्यसमितिहरूमा पदाधिकारी दोहोर्याउने अभ्यास नभएको दाबी गर्दै आफूलाई पनि परीक्षण हुन बाँकी नेतृत्वका रूपमा अवसर दिनुपर्ने धारणा राखे।
केन्द्रीय कार्यसमितिमा नरहे पनि पार्टीका निर्णय कार्यान्वयन तथा नीतिगत विषयमा आफूले निरन्तर बहस र पैरवी गर्दै आएको तिवारीले बताए।
तिवारीलाई पार्टी सभापति गगन थापाको विश्वासपात्रका रूपमा समेत लिइन्छ।
