काठमाडौँ । नेपाली काँग्रेसकी नेतृ महालक्ष्मी उपाध्याय ‘डिना’ले पार्टीभित्र अझै पनि महिलाको अर्थपूर्ण सहभागिता सुनिश्चित हुन नसकेको बताउनुभएको छ ।
नेपाली काँग्रेसको १५औँ महाधिवेशनमा महिला तर्फबाट महामन्त्री पदमा उम्मेदवारी दर्ता गराएपछि सञ्चारकर्मीसँग कुरा गर्दै उपाध्यायले पार्टीको शुद्धीकरणसँगै महिलासहित सबै समावेशी समूहको अर्थपूर्ण सहभागिता सुनिश्चित गर्न आफूले महामन्त्रीमा उम्मेदवारी दिएको बताउनुभयो ।
उहाँले नेपाली काँग्रेसले संविधानमा स्वीकार गरेको समावेशी सिद्धान्तलाई पार्टीको संगठनमा समेत व्यवहारिक रूपमा कार्यान्वयन गर्न नसकेको बताउनुभयो । पार्टीको सिद्धान्तअनुसार सबै समूह र विचारलाई समेटेर काँग्रेसलाई अघि बढाउनु आफ्नो मुख्य प्रतिबद्धता रहेको उहाँको भनाइ छ ।
उपाध्यायले भन्नुभयो, “नेपाली काँग्रेस पार्टीको शुद्धीकरण, संगठन शुद्धीकरण र महिलाहरूको नेतृत्व तहमा पुगेर महिलाहरूको अर्थपूर्ण सहभागिताका लागि मैले महामन्त्रीमा उम्मेदवारी दिएको हुँ । महिलाहरूको अधिकारलाई संरक्षण गर्दै हिजो हामीले संविधानसभामा बसेर लेख्यौँ । तर पार्टीभित्र महिलाहरूको अर्थपूर्ण सहभागिता नहुँदा कार्यान्वयन पक्ष फितलो भएको छ ।”
उहाँले काँग्रेसले लिएको समावेशी सिद्धान्तलाई पार्टी संगठनमा पनि प्रत्याभूत गर्नुपर्नेमा जोड दिनुभयो । “मेरो प्रतिबद्धता भनेको तमाम समावेशीहरूको सबै विचारलाई समेट्ने एउटा पार्टी बनाउनुपर्छ भन्ने हो,” उहाँले भन्नुभयो ।
उपाध्यायले देशभरबाट आएको माग र आवश्यकतालाई सम्बोधन गर्न काँग्रेसको पदाधिकारी तथा केन्द्रीय सदस्यको संख्या बढाइएको बताउनुभयो । पार्टीभित्र यस विषयमा आलोचना भइरहेको भए पनि अन्य राजनीतिक दलको तुलनामा काँग्रेसको केन्द्रीय समितिको संख्या अझै कम रहेको उहाँको दाबी छ ।
ठूलो संख्याको केन्द्रीय समितिले प्रभावकारी रूपमा काम गर्दै पार्टी निर्माणमा परिणाम दिन सके त्यसप्रतिको विरोध अन्त्य हुने उहाँले बताउनुभयो ।
“अहिलेको आवश्यकता र मागबमोजिम देशभरबाट केन्द्रीय समितिमा काम गर्छु भन्नेहरूको संख्या बढेकाले केही संख्या बढाइएको हो । अन्य राजनीतिक पार्टीभन्दा हाम्रो कमै छ, अहिले पनि । भोलि यति संख्याले काम गर्दा साँच्चिकै पार्टी बन्दो रहेछ भन्ने प्रत्याभूति गराउन सकियो भने यो विरोधाभास अन्त्य हुन्छ,” उहाँले भन्नुभयो ।
उपाध्याय नेपाली काँग्रेसको १४औँ महाधिवेशनबाट सहमहामन्त्रीमा निर्वाचित हुनुभएको थियो । यसअघि सहमहामन्त्री भएर काम गरिसकेको अनुभव रहेकाले अहिले महामन्त्री पदमा आफ्नो दाबी स्वाभाविक रहेको उहाँको भनाइ छ ।
–न्युज एजेन्सी नेपाल
