काठमाडौं । नेपाली कांग्रेसकी उपसभापति पुष्पा भुसालले पार्टीको १५औँ ऐतिहासिक महाधिवेशन केवल पद र नेतृत्व व्यवस्थापन गर्ने माध्यम नभई आत्मसुधार, पुनर्जागरण र नीतिगत पुनर्संरचनाको थलो बन्नुपर्ने बताउनुभएको छ ।
काठमाडौंको खुलामञ्चमा आइतबारदेखि सुरु भएको महाधिवेशनको उद्घाटन सत्रलाई सम्बोधन गर्दै भुसालले जनतामाझ गुम्दै गएको विश्वास फर्काउन र नयाँ पुस्ताको आकाङ्क्षा सम्बोधन गर्न कांग्रेसले निर्मम आत्मसमीक्षा गर्नुपर्ने बताउनुभयो ।
उहाँले लामो समयदेखि लोकतन्त्रका लागि संघर्ष गर्दै आएको ऐतिहासिक शक्ति भएकाले कांग्रेसको वर्तमान र भविष्यको स्पष्ट मार्गचित्र कोर्ने दायित्व यसै महाधिवेशनको काँधमा रहेको बताउनुभयो ।
भुसालले पार्टीभित्रको आन्तरिक लोकतन्त्रलाई थप समावेशी र संस्थागत बनाउन तथा केन्द्रीय तहका निर्णयलाई पारदर्शी बनाएर तल्लो तहसम्म पुर्याउन महाधिवेशन प्रतिनिधिहरूलाई आग्रह गर्नुभयो ।
मुलुकको जनसङ्ख्यामा ठूलो हिस्सा ओगट्ने नयाँ पुस्ताले सुशासन, रोजगारी र भ्रष्टाचारमुक्त समाज खोजिरहेको उल्लेख गर्दै उहाँले उनीहरूको सपना र भरोसालाई सम्बोधन गर्नेगरी कांग्रेस अघि बढ्नुपर्नेमा जोड दिनुभयो ।
संविधान, कानुनी शासन र मानवअधिकारविपरीत हुने कुनै पनि अलोकतान्त्रिक अभ्यास कांग्रेसलाई स्वीकार्य नहुने स्पष्ट पार्दै भुसालले बीपी कोइरालाको लोकतान्त्रिक समाजवाद र राष्ट्रियताको सिद्धान्तलाई महाधिवेशनको मूल मर्म बनाउनुपर्ने बताउनुभयो ।
उहाँले महाधिवेशनलाई केवल पद प्राप्ति वा पद व्यवस्थापनका लागि हुने सामान्य भेला नभई कांग्रेसको वर्तमान र भविष्यबारे चिन्तन, संवाद र आत्मसमीक्षा गर्ने महत्वपूर्ण अवसरका रूपमा लिनुपर्ने बताउनुभयो ।
भुसालले महाधिवेशनपछि जनताको विश्वास अझ बढाउन गाउँ–गाउँमा जाने ऊर्जा र प्रतिबद्धता पार्टीसँग छ कि छैन तथा आन्तरिक लोकतन्त्रलाई थप लोकतान्त्रिक, समावेशी र सुदृढ बनाउन पार्टी तयार छ कि छैन भन्ने प्रश्नको जवाफ महाधिवेशन प्रतिनिधिहरूले खोज्नुपर्ने धारणा राख्नुभयो ।
मुलुकको जनसङ्ख्यामा महिलाको हिस्सा ५१ प्रतिशत रहेको स्मरण गराउँदै उहाँले आन्दोलन, निर्वाचन र समाज सञ्चालनमा महिलाले आफ्नो सामर्थ्य प्रमाणित गरिसकेको बताउनुभयो । अब पार्टी र राज्यको नीति निर्माण तहमा महिलाको निर्णायक उपस्थिति सुनिश्चित गर्नुपर्नेमा उहाँले जोड दिनुभयो ।
