काठमाडौं । पूर्वराष्ट्रपति एवं नेकपा (एमाले)की वरिष्ठ नेता विद्यादेवी भण्डारीले राजनीतिलाई केवल पद प्राप्त गर्ने माध्यमका रूपमा नभई समाज र राष्ट्रप्रतिको जिम्मेवारीका रूपमा बुझ्नुपर्ने बताउनुभएको छ ।
आइतबार काठमाडौंमा आनन्दप्रसाद पोखरेलद्वारा लिखित ‘जीवनी, विचार, संघर्ष र नेतृत्व’ पुस्तक विमोचन कार्यक्रममा बोल्दै भण्डारीले विगतमा राजनीतिक दल तथा नेताहरूले गरेको संघर्ष र अनुभवले राजनीतिलाई जिम्मेवारीका रूपमा बुझ्नुपर्ने पुष्टि गरेको बताउनुभयो ।
उहाँले नयाँ पुस्तामा राजनीति र सार्वजनिक जीवनप्रति चासो बढेसँगै विभिन्न प्रश्न र असन्तुष्टि पनि देखिएको उल्लेख गर्दै नयाँ र पुरानो पुस्ताबीचको संवाद अहिलेको महत्वपूर्ण आवश्यकता भएको बताउनुभयो ।
पुरानो पुस्ताको अनुभव र नयाँ पुस्ताको ऊर्जा एकअर्काका विकल्प नभएको उल्लेख गर्दै भण्डारीले दुवै पुस्ताको अनुभव र ऊर्जाको उचित संयोजनबाट राजनीतिक तथा सामाजिक जीवनलाई थप गतिशील र समावेशी बनाउन सकिने बताउनुभयो ।
उहाँले अहिलेको पुस्ताले विगतका राजनीतिक संघर्ष र परिवर्तनका प्रक्रियालाई प्रत्यक्ष अनुभव गर्न नपाएको बताउँदै निरङ्कुश पञ्चायती व्यवस्थाविरुद्धको संघर्ष, २०४६ सालको जनआन्दोलन, त्यसपछिका राजनीतिक परिवर्तन, संसदीय अभ्यास, संविधानसभा र संविधान निर्माणसम्मको यात्राबारे नयाँ पुस्तालाई जानकारी गराउनुपर्नेमा जोड दिनुभयो ।
राजनीतिक इतिहासलाई घटनाहरूको सूचीका रूपमा मात्र नभई मानिसका अनुभव, संघर्ष र निर्णयसँग जोडेर बुझ्नुपर्ने उहाँको भनाइ थियो । पोखरेलद्वारा लिखित पुस्तकले एक व्यक्तिको राजनीतिक जीवनसँगै एउटा पुस्ताको राजनीतिक अनुभव तथा सामाजिक–राजनीतिक यात्राका महत्वपूर्ण पक्षलाई समेट्ने प्रयास गरेको उहाँले बताउनुभयो ।
भण्डारीले अहिलेको पुस्तामा राजनीतिप्रति देखिएको चासो र असन्तुष्टिलाई सम्बोधन गर्न विगतका राजनीतिक आन्दोलन तथा संघर्षबारे ज्ञान हस्तान्तरण गर्ने गरी अझै धेरै पुस्तक लेखिनुपर्ने आवश्यकता औँल्याउनुभयो ।
