त्यागी तथा बौद्धिक नेताका रूपमा परिचित सम्बाहाम्फेले ‘नेपाली कांग्रेसको आस्था र प्रतिष्ठालाई युगसापेक्ष उचाइमा पुर्याऔँ, त्यागी तथा बौद्धिक नेता विजय सम्बाहाम्फेलाई जिताऔँ’ भन्ने नारासहित उम्मेदवारी अघि सारेका हुन् ।
नेपाली कांग्रेसमा लामो समयदेखि सक्रिय सम्बाहाम्फेले पार्टीका विभिन्न तहमा रहेर संगठन निर्माण, नीति तथा बौद्धिक बहस, शिक्षा र सामाजिक क्षेत्रमा योगदान दिँदै आएका छन् । तेह्रथुम जिल्ला कार्यसमितिको कोषाध्यक्षबाट सांगठनिक जिम्मेवारी सुरु गरेका उनले पार्टीको सूचना तथा सञ्चार विभागको केन्द्रीय सदस्य र पेशागत तथा बुद्धिजीवी विभागको सचिवको जिम्मेवारीसमेत सम्हालिसकेका छन् ।
यसअघि महासमिति सदस्य रहेका सम्बाहाम्फे हालै तेह्रथुमबाट महाधिवेशन प्रतिनिधिमा निर्वाचित भएका हुन् । २०७४ सालको प्रदेशसभा निर्वाचनमा तेह्रथुम ‘ख’ बाट कांग्रेसका उम्मेदवार बनेका उनी थोरै मतान्तरले पराजित भएका थिए । निर्वाचनमा पराजित भए पनि उनले पार्टी संगठन, नीति निर्माण तथा सामाजिक क्षेत्रमा आफ्नो सक्रियता निरन्तरता दिएका छन् ।
राजनीतिसँगै व्यवसायमा समेत सक्रिय सम्बाहाम्फेले शिक्षा, पर्यटन, कृषि, जलविद्युत् तथा बैंकिङ र वित्तीय क्षेत्रमा लगानी गरेका छन् । उनका व्यवसाय तथा लगानीबाट रोजगारी सिर्जना हुनुका साथै विभिन्न परिवारलाई आत्मनिर्भर बन्न सहयोग पुगेको बताइएको छ ।
सम्बाहाम्फे शिक्षा क्षेत्रका अनुभवी व्यक्तित्वका रूपमा समेत परिचित छन् । निजी तथा आवासीय विद्यालयहरूको छाता संगठन प्याब्सनको केन्द्रीय अध्यक्षको जिम्मेवारी सम्हालेका उनले शिक्षा क्षेत्रको सुधार र रूपान्तरणका लागि विभिन्न नीतिगत अवधारणा तथा योजनामा काम गरेका थिए । उनले विभिन्न विकसित मुलुकको शिक्षा प्रणाली, नीति तथा अभ्यासको अध्ययनसमेत गरेका छन् ।
शिक्षा क्षेत्रको अनुभव र क्षमताका आधारमा सरकारले उनलाई राष्ट्रिय उच्च शिक्षा आयोगको सदस्यको जिम्मेवारीसमेत दिएको थियो ।
कांग्रेसका विभिन्न तहका नेतासँग उनको सौहार्दपूर्ण सम्बन्ध रहेको पार्टीका नेताहरू बताउँछन् । उनको उम्मेदवारीलाई पार्टीभित्र अनुभव, समन्वय क्षमता र बौद्धिकताको प्रतिनिधित्वका रूपमा हेरिएको छ ।
नेपाल लोकतन्त्रवादी आदिवासी जनजाति महासंघका केन्द्रीय सदस्य भागीमान गुरुङले सम्बाहाम्फेको उम्मेदवारीले आदिवासी जनजाति समुदायमा उत्साह थपिएको बताए । लामो राजनीतिक अनुभव, बौद्धिक क्षमता र विभिन्न क्षेत्रमा हासिल गरेको उपलब्धिले कांग्रेसमा आदिवासी जनजाति समुदायको प्रतिनिधित्वलाई थप प्रभावकारी बनाउन सहयोग पुग्ने उनको भनाइ छ ।
‘विजय सरको उम्मेदवारी घोषणाले सिंगो आदिवासी समुदायमा उत्साह पैदा भएको छ । उहाँको भूमिका र अनुभवले नेपाली कांग्रेसलाई नयाँ उचाइमा पुर्याउन थप योगदान पुग्ने विश्वास लिएका छौँ,’ गुरुङले भने ।
सम्बाहाम्फेले शिक्षा, राजनीति, व्यवसाय र सामाजिक क्षेत्रमा हासिल गरेको अनुभवलाई पार्टीको नीति निर्माण तथा संगठन सुदृढीकरणमा उपयोग गर्ने लक्ष्य लिएका छन् । पार्टीको आन्तरिक लोकतन्त्रलाई बलियो बनाउँदै कांग्रेसलाई समयअनुकूल, विचारप्रधान र जनमुखी पार्टीका रूपमा अघि बढाउने आफ्नो उद्देश्य रहेको उनले बताउँदै आएका छन् ।
नयाँ पुस्ता, आदिवासी जनजाति, पेशागत तथा बौद्धिक समुदायलाई पार्टीको मूलधारमा थप प्रभावकारी रूपमा जोड्ने प्रतिबद्धता पनि उनले व्यक्त गरेका छन् ।
उम्मेदवारीलाई समर्थन जुटाउन सम्बाहाम्फेले मेचीदेखि महाकालीसम्मका कांग्रेस नेता तथा कार्यकर्तासँग भेटघाट र परामर्श गरिरहेका छन् । नेता तथा कार्यकर्तासँग प्रत्यक्ष संवादलाई प्राथमिकता दिएका उनले असोज १८ गते सम्पर्क कार्यालय स्थापना गर्ने तयारी गरेको उनको सचिवालयले जनाएको छ ।
कांग्रेसको १५औँ महाधिवेशन नजिकिँदै जाँदा विभिन्न समूह, समुदाय र क्लस्टरबाट केन्द्रीय सदस्य तथा अन्य पदमा उम्मेदवारी घोषणा गर्ने क्रम तीव्र बनेको छ । यसै क्रममा आदिवासी जनजाति क्लस्टरबाट सम्बाहाम्फेको उम्मेदवारीलाई राजनीतिक अनुभव, बौद्धिक क्षमता, सामाजिक योगदान र व्यवसायिक पृष्ठभूमिको संयोजनका रूपमा हेरिएको छ ।
