पोखरा । नेसनल प्याब्सन कास्कीको आयोजनामा नेपाली भाषाज्ञान प्रतियोगिता–२०८३ सम्पन्न भएको छ। प्रतियोगितामा माध्यमिक, आधारभूत तथा कक्षा १ देखि ५ सम्मका विद्यार्थीहरूले सहभागिता जनाएका थिए।
माध्यमिक तहतर्फ मर्निङ ग्लोरी एकेडेमिक स्कुल प्रथम, रिलायन्स पब्लिक स्कुल द्वितीय, डायनामिक एकेडेमी तृतीय र सिलसिला इङ्लिस स्कुलले सान्त्वना स्थान हासिल गरेका छन्।
त्यस्तै, आधारभूत तहतर्फ लिटिल फ्लावर एजुकेशनल मावि प्रथम, मर्निङ ग्लोरी एकेडेमिक स्कुल द्वितीय, पिनाकल एकेडेमी तृतीय तथा सिलसिला इङ्लिस स्कुलले सान्त्वना स्थान प्राप्त गरेका छन्।
कक्षा १ देखि ५ सम्मको तहमा मर्निङ ग्लोरी एकेडेमिक स्कुल प्रथम, रिलायन्स पब्लिक स्कुल द्वितीय, एकता आवासीय मावि तृतीय र पिनाकल एकेडेमीले सान्त्वना स्थान हासिल गरेका छन्।
प्रतियोगितापछि आयोजित पुरस्कार वितरण कार्यक्रममा प्रमुख अतिथि पोखरा महानगरपालिका शिक्षा महाशाखाका अधिकृत जीवन रेग्मीले विजयी विद्यार्थीलाई पुरस्कार प्रदान गरे। उनले अंग्रेजी माध्यमबाट अध्यापन गराउने विद्यालयका विद्यार्थीले नेपाली भाषाज्ञानमा गरेको प्रगतिप्रति प्रशंसा व्यक्त गर्दै यस्ता प्रतियोगिताले विद्यार्थीमा नेपाली भाषा सिक्ने र प्रयोग गर्ने उत्साह बढाउने बताए।
कार्यक्रममा नेसनल प्याब्सनका केन्द्रीय कार्यक्रम व्यवस्थापन संयोजक कमल रानाभाटले शुभकामना मन्तव्य व्यक्त गरेका थिए। संस्थाका उपाध्यक्ष विकल पौडेलले स्वागत मन्तव्य राखेका थिए।
नेसनल प्याब्सन कास्कीका अध्यक्ष रोशन कोइरालाको अध्यक्षतामा सम्पन्न कार्यक्रममा कोषाध्यक्ष तथा अतिरिक्त क्रियाकलाप संयोजक कमल थापाले कार्यक्रम सञ्चालन गरेका थिए।
प्रतियोगितामा नेपाली भाषा शिक्षक परिषद् कास्कीका तर्फबाट शिवहरि सुवेदी, लोकचन्द्र खनाल र शशि शिशिर ढुंगानाले विशेषज्ञका रूपमा सहजीकरण गरेका थिए।
