काठमाडौं । नेपाल टेलिकमले बाढीबाट प्रभावित रसुवा, धादिङ र नुवाकोटका थप चारवटा साइट सञ्चालनमा ल्याएको छ।
टेलिकमले आज भदौ १५ गते रसुवाको जिबजिबे र सरमथली, धादिङको बेनीघाट तथा नुवाकोटको त्रिशूली बजारस्थित साइट सुचारु गरेको हो।
यी चार साइट सञ्चालनमा आएसँगै बाढीबाट प्रभावित भएका नेपाल टेलिकमका कुल १२० साइटमध्ये ११० वटा साइट पुनः सञ्चालनमा आएका छन्।
जिबजिबे टावर सञ्चालनमा आएपछि भोर्ले, चिती, गाइसौरा, भोर्लेलगायत नौकुण्ड गाउँपालिका–५ र ६ का विभिन्न स्थानका सेवाग्राहीलाई सञ्चार सेवा सहज हुने टेलिकमले जनाएको छ।
त्यस्तै, सरमथली टावरबाट यार्सा, लच्याङ, सिमबन्दी, बिजिली जोङलगायत आसपासका क्षेत्रका सेवाग्राही लाभान्वित हुनेछन्।
धादिङको बेनीघाट साइट सञ्चालनमा आएपछि बेनीघाट बजार तथा आसपासका क्षेत्रमा सञ्चार सेवा सहज हुनेछ। नुवाकोटको त्रिशूली साइट सुचारु भएसँगै त्रिशूली बजार र ढुंगे आसपासका क्षेत्रमा समेत सञ्चार सेवा पुनः सहज हुने भएको छ।
बाढीका कारण प्रभावित दूरसञ्चार सेवा क्रमशः पुनःस्थापना गर्दै लगिएको नेपाल टेलिकमले जनाएको छ।
