काठमाडौं । पशुपति क्षेत्र विकास कोषले भदौ १० गते आएको बाढीपहिरोका कारण ज्यान गुमाएका व्यक्तिको पशुपति आर्यघाटमा निःशुल्क दाहसंस्कार तथा कृयापुत्री सेवा उपलब्ध गराउने भएको छ।
कोषले विपद्का कारण दिवंगत भएकाहरूको सम्मानपूर्वक अन्त्येष्टि गर्न दाहसंस्कार तथा कृयापुत्रीसम्बन्धी लाग्ने सम्पूर्ण शुल्क नलिने व्यवस्था मिलाएको जनाएको छ।
धार्मिक तथा सामाजिक परम्पराअनुसार मृतकको अन्त्येष्टि कार्य सहज रूपमा सम्पन्न गर्न मृतकका परिवारजनलाई आवश्यक सहजीकरण गर्ने उद्देश्यले उक्त व्यवस्था गरिएको कोषले जनाएको छ।
पशुपति क्षेत्र विकास कोषका अनुसार बाढीपहिरोबाट प्रभावित मृतकका परिवारले अन्त्येष्टि तथा कृयापुत्री सेवासम्बन्धी आवश्यक जानकारीका लागि कोषमा सम्पर्क गर्न सक्नेछन्।
कोषका सूचना अधिकारीसँग ९८५१०६४२७४ तथा पशुपति क्षेत्र विकास कोषको कार्यालयमा ०१४५७१८२८ नम्बरमा सम्पर्क गर्न सकिनेछ।
