काठमाडौं । त्रिशूली-३एमा फसेका श्रमिक/कर्मचारी उद्धार गर्न पुरिएको केवल टनेलभित्र फसेका व्यक्तिको खोज तथा उद्धारका लागि उद्धार टोली टनेल पोर्टसम्म पुगेको छ । उद्धार कार्य अघि बढाउन अहिले पोर्टको मुख सफा गर्ने काम भइरहेको छ ।
पोर्ट सफा गर्ने काम सम्पन्न भएपछि अक्सिजनसहित उद्धारकर्मीलाई टनेलभित्र पठाउने तयारी गरिएको छ । उद्धारकर्मीले टनेलभित्रको अवस्थाको प्रत्यक्ष निरीक्षण गर्दै सुरक्षित रूपमा अगाडि बढ्नेछन् ।
उद्धारकर्मीसँग क्यामरासमेत टनेलभित्र पठाइने भएको छ । क्यामरामार्फत टनेलभित्रको वास्तविक अवस्था बाहिरबाटै हेर्न सकिनेछ, जसले खोज तथा उद्धार कार्यलाई थप प्रभावकारी बनाउन सहयोग पुग्ने अपेक्षा गरिएको छ ।
उद्धार टोली पोर्टबाट करिब १८० मिटर अगाडि पुगेपछि सम्भावित ‘वर्किङ स्पेस’ सम्म पुग्न सकिने अनुमान गरिएको छ ।
उक्त स्थानमा पुगेपछि टनेलभित्र फसेका व्यक्तिहरूको वास्तविक अवस्था, उनीहरू रहेको स्थान तथा सुरक्षाको अवस्थाबारे थप स्पष्ट जानकारी प्राप्त हुने अपेक्षा गरिएको छ ।त्यसपछि प्राप्त अवस्थाका आधारमा थप खोज तथा उद्धार कार्य अघि बढाइनेछ ।
