काठमाडौं । राष्ट्रिय स्वतन्त्र पार्टी (रास्वपा) का महामन्त्री कुविन्द्र बुर्लाकोटीले विपद्को समयमा गोरखामा वितरण भएका केही एलपी ग्यास सिलिन्डरमा मापदण्डभन्दा करिब ५ केजीसम्म कम ग्यास रहेको जानकारी आएको भन्दै तत्काल छानबिन गरी दोषीमाथि कारबाही गर्न माग गरेका छन्।
सामाजिक सञ्जालमार्फत धारणा सार्वजनिक गर्दै बुर्लाकोटीले आफूलाई प्राप्त विवरणसहित प्रमुख जिल्ला अधिकारीसँग समन्वय गरी छानबिन तथा कारबाहीको प्रक्रिया अघि बढाउन आग्रह गरेको बताएका छन्।
उनले विपद्को मौका छोपी हुन सक्ने सम्भावित अनियमिततामाथि कडा निगरानी आवश्यक रहेको उल्लेख गरेका छन्।
उद्योगहरूले आफ्ना उत्पादनको तोकिएको मापदण्ड पुनः जाँच गर्नुपर्ने र सम्बन्धित नियामक निकायले नियमित तथा प्रभावकारी अनुगमन गर्नुपर्ने उनको भनाइ छ।
नियामक निकायको प्रभावकारी अनुगमनमा कमी देखिए सम्बन्धित निकायलाई समेत जवाफदेही बनाउनुपर्ने बुर्लाकोटीले बताएका छन्।
