काठमाडौं । बाजुरामा पशुचौपायामा लाग्ने विभिन्न रोग नियन्त्रणका लागि पहिलोपटक सञ्चालन गरिएको जिल्लाव्यापी पूर्ण खोप कार्यक्रम प्रभावकारी देखिएको छ ।
भेटेरिनरी अस्पताल तथा पशु सेवाविज्ञ केन्द्र बाजुराले विसं २०८२ पुसदेखि जिल्लाका नौवटै स्थानीय तहमा खोप अभियान सञ्चालन गरी खोरेत, लम्पीस्किन, पिपिआर र इटी रोगविरुद्ध एक लाख ७४ हजार पाँच सय ९८ डोज खोप लगाएको छ ।
केन्द्रका प्रमुख सिद्धराज जैशीका अनुसार पशुचौपायामा देखिने विभिन्न रोगको रोकथामका लागि जिल्लाका नौवटै स्थानीय तहका प्रत्येक वडामा पुगेर खोप सेवा दिइएको हो । अभियानका लागि २८ जना खोपकर्ता तथा पशु प्राविधिक परिचालन गरिएको उहाँले बताउनुभयो ।
अभियानअन्तर्गत गाई, भैँसी, बाख्रा र भेडामा लाग्ने खोरेत रोगविरुद्ध ६७ हजार पाँच सय १७ पशुचौपायालाई खोप लगाइएको छ । गाई र भैँसीमा देखिने लम्पीस्किन रोगविरुद्ध तीन हजार चार सय ९६ पशुलाई, भेडा तथा बाख्रामा लाग्ने पिपिआर रोगविरुद्ध एक लाख पाँच हजार सात सय २० पशुलाई र इटी रोगविरुद्ध दुई हजार पशुलाई खोप लगाइएको केन्द्र प्रमुख जैशीले जानकारी दिनुभयो ।
जिल्लाव्यापी खोप अभियान सञ्चालन गरेपछि हालसम्म ती रोगको प्रकोप नदेखिएको र यसले रोग नियन्त्रण तथा सम्भावित जोखिम न्यूनीकरणमा सहयोग पुगेको जैशीले बताउनुभयो । “पशुचौपायामा खोरेत, लम्पीस्किन, पिपिआर र इटी रोगको सङ्क्रमण देखिए किसानले ठूलो क्षति व्यहोर्नुपर्ने हुनसक्छ । त्यसकारण रोग लागेपछि उपचार गर्नुभन्दा अगाडि नै खोप लगाउनु महत्वपूर्ण हुन्छ”, उहाँले भन्नुभयो ।
बाजुराजस्तो दुर्गम तथा भौगोलिक रूपमा विकट जिल्लामा समयमै खोप सेवा नपुग्ने समस्या रहेकोमा पहिलोपटक गाउँमै पुगेर जिल्लाव्यापी अभियान सञ्चालन गरिएको उहाँले बताउनुभयो ।
यसअघि पशुचौपायामा समस्या देखिए पालिका तथा जिल्ला सदरमुकामसम्म पुग्नुपर्ने बाध्यता रहेका किसानले गाउँमै निःशुल्क खोप सेवा पाएपछि राहत महसुस गरेका छन् । नियमित खोप सेवा नहुँदा पशुचौपाया मर्ने तथा दूध र मासु उत्पादन घटेर आर्थिक क्षति व्यहोर्दै आएका किसानलाई निःशुल्क र सहज रूपमा खोप सेवा उपलब्ध हुँदा ठूलो राहत मिलेको स्थानीय दलबहादुर रावतले बताउनुभयो ।
यसैबीच, भेटेरिनरी अस्पताल तथा पशु सेवा विज्ञ केन्द्र बाजुराले गत आर्थिक वर्षमा २५ हजार दुई सय ७८ पशुपन्छीको उपचार तथा पशु सेवा परामर्श दिएको जनाएको छ । केन्द्रले लक्ष्यअनुसार बडीमालिका नगरपालिका–१, गौमुल गाउँपालिका–१ तथा खप्तड छेडेदह गाउँपालिकाका वडा नं ६ र ७ मा गरी चारवटा पशु स्वास्थ्य शिविर सञ्चालन गरी छ हजार ७४ पशुपन्छीको उपचार तथा खोप लगाएको जनाएको छ ।
