काठमाडौं । नेपाल ट्रक यातायात व्यवसायी महासंघले रसुवाको टिमुरेमा आएको बाढीका कारण सम्पर्कविहीन भएका मालवाहक सवारीसाधन तथा त्यसमा सवार चालक, सहचालक र यातायात मजदुरको विवरण उपलब्ध गराउन सदस्य संस्थाहरूलाई आग्रह गरेको छ।
महासंघका अनुसार गत भदौ १० गते बिहान करिब ९ बजे चीनको तिब्बती भू–भागबाट आएको बाढीले रसुवाको टिमुरे क्षेत्रमा ठूलो जनधनको क्षति पुर्याएको छ। बाढीका कारण टिमुरे भन्सार यार्डमा रहेका, सामान लोड गर्न गएका तथा सामान लोड गरी गन्तव्यतर्फ फर्किरहेका मालवाहक सवारीसाधनसमेत प्रभावित भएका छन्।
त्यसैगरी, भन्सार नाकामा सामान लोड गर्न प्रतीक्षामा रहेका सवारीसाधनहरू वेत्रावतीलगायत विभिन्न क्षेत्रमा पार्किङ गरी राखिएको अवस्थामा बाढीबाट ठूलो क्षति भएको प्रारम्भिक जानकारी प्राप्त भएको महासंघले जनाएको छ।
सम्पर्कमा नरहेका सवारीसाधन तथा त्यसमा सवार व्यक्तिहरूको खोज तथा उद्धारमा सहयोग पुर्याउन महासंघले आफ्ना सदस्य संस्था तथा सम्बन्धित संघ–समितिहरूलाई व्यवसायी, चालक, सहचालक, मजदुर र सवारीसाधनको विवरण तत्काल संकलन गरी उपलब्ध गराउन अनुरोध गरेको हो।
महासंघका अध्यक्ष राजेन्द्र विक्रम बाँनियाको निर्देशनअनुसार विवरण यथाशीघ्र महासंघको केन्द्रीय कार्यालयमा पठाउन सदस्य संस्थाहरूलाई आग्रह गरिएको छ।
महासंघले संकलित विवरण नेपाल सरकारको विपद् व्यवस्थापन समिति तथा सुरक्षा निकायलाई उपलब्ध गराई खोज तथा उद्धार कार्यमा सहजीकरण गर्ने जनाएको छ।
