काठमाडौं । सत्तारुढ राष्ट्रिय स्वतन्त्र पार्टी (रास्वपा) का सभापति रवि लामिछानेको तय भएको चीन भ्रमण तत्कालका लागि स्थगित भएको छ ।
लामिछाने यही भदौको पहिलो साता चीन भ्रमणमा जाने तयारीमा थिए । तर, भ्रमणको कार्यक्रम हाललाई रोकिएको स्रोतले जनाएको छ । भ्रमणको नयाँ मिति भने अहिलेसम्म तय भइसकेको छैन ।
स्रोतका अनुसार लामिछाने अब असोजतिर चीन भ्रमणमा जाने सम्भावना छ । यसअघि उनी भदौ ७ देखि १४ गतेसम्म चीन जाने कार्यक्रम तय भएको थियो ।
लामिछानेले पत्नी निकिता पौड्यालसहित पाँच सदस्यीय प्रतिनिधिमण्डलको नेतृत्व गर्दै चीन भ्रमण गर्ने तयारी थियो । भ्रमणका क्रममा राजधानी बेइजिङ पुग्नुका साथै तिब्बतस्थित कैलाश मानसरोवरसमेत जाने कार्यक्रम बनाइएको थियो ।
भ्रमण स्थगित हुनुको कारणबारे भने रास्वपाले औपचारिक रूपमा केही जानकारी दिएको छैन ।
