काठमाडौं । प्रमुख प्रतिपक्षी दल नेकपा (एमाले) का सांसद राजेन्द्रकुमार राईले गाँजा खेतीलाई तत्काल कानुनी मान्यता दिन सरकारसँग माग गर्नुभएको छ ।
मंगलबार प्रतिनिधि सभाको बैठकमा विशेष समय लिएर बोल्दै सांसद राईले गाँजा खेतीलाई आर्थिक समृद्धिको आधार बनाउन आवश्यक कानुन तथा विधि निर्माण गर्न सरकारको ध्यानाकर्षण गराउनुभयो ।
उहाँले गाँजा खेतीका कारण आफ्नो निर्वाचन क्षेत्र धनकुटाका १८ देखि ३० वर्ष उमेर समूहका धेरै युवा कानुनी झमेलामा परी जेलमा रहेको बताउँदै निर्दोष युवालाई तत्काल रिहा गर्न माग गर्नुभयो । गाँजा खेतीकै कारण स्थानीयमा निराशा र त्रास फैलिएको उहाँको भनाइ थियो ।
विश्व स्वास्थ्य संगठन र संयुक्त राष्ट्रसंघले गाँजालाई लागुऔषधको सूचीबाट हटाएर औषधीय गुण भएको वनस्पतिका रूपमा प्रमाणित गरिसकेको दाबी गर्दै राईले विश्वका ६२ भन्दा बढी देशले गाँजाबाट आर्थिक लाभ लिइरहेको बताउनुभयो । भारतले समेत गाँजाबाट वार्षिक अर्बौँ रुपैयाँ आम्दानी गरिरहेको र विश्व बजारमा यसको माग उच्च रहेको उहाँको भनाइ थियो ।
गाँजाबाट क्यान्सर, क्षयरोग, मधुमेह र युरिक एसिडलगायत रोगको औषधि बनाउन सकिने भन्दै उहाँले नेपालमा गाँजा प्रशोधन केन्द्र स्थापना गर्नुपर्नेमा जोड दिनुभयो । पहाडी जिल्लाबाट भइरहेको तीव्र बसाइँसराइ रोक्न तथा स्थानीयस्तरमा रोजगारी सिर्जना गर्न गाँजा खेती महत्वपूर्ण आधार बन्न सक्ने उहाँले बताउनुभयो ।
“१८ देखि ३० वर्ष उमेर समूहका धेरै युवाहरू जीविकोपार्जनका लागि गाँजा खेती गर्दा आज जेलमा छन् । यसले गर्दा धनकुटाका जनतामा निराशा र त्रास छाएको छ,” उहाँले भन्नुभयो, “गाँजाबाट बनेका जुत्ता, मोजा र टोपी प्रयोग गर्न हुने तर यसको व्यावसायिक खेती र बिक्री गर्न किन नहुने ? यो गम्भीर प्रश्न हो ।”
गण्डकी प्रदेशले गाँजा खेतीसम्बन्धी कानुन निर्माण गरिसकेको उदाहरण दिँदै सांसद राईले संघीय सरकारले समेत यस विषयमा ढिलाइ गर्न नहुने बताउनुभयो ।
उहाँले गाँजा ओसारपसार तथा खेतीको आरोपमा पक्राउ परेका निर्दोष युवालाई तत्काल रिहा गर्न माग गर्दै समयमै कानुन निर्माण नगरिए जनतामा रहेको असन्तुष्टि विद्रोहको रूप लिन सक्ने चेतावनी दिनुभयो ।
प्राकृतिक स्रोतका रूपमा रहेको गाँजालाई वैधानिक दायरामा ल्याएर यसको उत्पादन, प्रशोधन र बजारीकरण गर्न सके मुलुकको अर्थतन्त्र सुदृढ बनाउन योगदान पुग्ने उहाँको निष्कर्ष थियो ।
