राष्ट्रिय स्वतन्त्र पार्टी (रास्वपा) ले संसद बैठकलाई थप व्यवस्थित र प्रभावकारी बनाउने उद्देश्यले आफ्ना सांसदका लागि बैठकमा अनुपस्थित हुने तथा बैठक छाड्नुपर्ने अवस्थाबारे पूर्वजानकारी दिनुपर्ने व्यवस्था गरेको छ।
रास्वपाले सांसदहरूलाई कारणवश संसद बैठकमा उपस्थित हुन नसक्ने, बैठकमा ३० मिनेटभन्दा ढिलो उपस्थित हुने, बैठकमा उपस्थित भएर बीचमै छाड्नुपर्ने वा बैठकको बीचमा बाहिर गएर पुनः फर्किनुपर्ने अवस्थामा अनिवार्य रूपमा ‘संसद बैठक अनुपस्थित आवेदन’ फारम भर्न निर्देशन दिएको हो।
पार्टीले सांसदहरूलाई पठाएको निर्देशनमा भनिएको छ, “कारणवश संसद बैठकमा उपस्थित हुन नसकेमा, बैठकमा ३० मिनेटभन्दा ढिलो उपस्थित हुने अवस्थामा, उपस्थित भएर बैठक बीचमै छोड्नुपर्ने भएमा वा बैठकको बीचमा बाहिर गई फर्किनुपर्ने भएमा संसद बैठक अनुपस्थित आवेदन फारम अनिवार्य पेश गर्न निर्देशन गरिन्छ।”
यसका लागि रास्वपाले सांसदहरूलाई चारवटा विकल्पसहितको आवेदन फारम उपलब्ध गराएको छ। जसमा (क) संसद बैठकमा पूरै उपस्थित हुन नसक्ने, (ख) बैठकमा ३० मिनेटभन्दा ढिलो उपस्थित हुने, (ग) उपस्थित भएर बैठक बीचमै छाड्नुपर्ने र (घ) बैठकको बीचमा बाहिर गएर फर्किनुपर्ने विकल्प राखिएका छन्।
पार्टीले उक्त व्यवस्थाले संसद बैठकमा सांसदहरूको उपस्थिति र अनुपस्थितिलाई व्यवस्थित बनाउन सहयोग पुग्ने जनाएको छ।
सांसदहरूले आवश्यक विवरणसहितको आवेदन फारम अनलाइनमार्फत पेश गर्नुपर्नेछ।
