काठमाडौं: जनआस्था साप्ताहिकका सम्पादक तथा आस्था मिडियाका अध्यक्ष किशोर श्रेष्ठलाई समाचार प्रकाशनको विषयलाई लिएर प्रहरीले पक्राउ गरेपछि पत्रकारिता क्षेत्र आन्दोलित भएको छ।
ललितपुरको नख्खुस्थित आफ्नै निवासबाट बुधबार साँझ पक्राउ परेका श्रेष्ठलाई काठमाडौं प्रहरी परिसरको हिरासतमा राखिएको छ। जनआस्था साप्ताहिकमा प्रकाशित समाचारलाई लिएर उनलाई पक्राउ गरिएको हो।
श्रेष्ठको पक्राउको विरोधमा पत्रकार महासंघकी अध्यक्ष निर्मला शर्मा, प्रेस चौतारी नेपालका अध्यक्ष गणेश पाण्डेलगायत पत्रकार तथा सञ्चारकर्मीहरू काठमाडौं प्रहरी परिसर पुगेका थिए। उनीहरूले परिसर अगाडि नाराबाजी गर्दै श्रेष्ठको तत्काल रिहाइको माग गरे।
पत्रकारहरूले समाचार प्रकाशनको विषयलाई लिएर सम्पादकलाई पक्राउ गर्नु प्रेस स्वतन्त्रतामाथिको हस्तक्षेप भएको बताएका छन्। उनीहरूले समाचारमा चित्त नबुझे कानुनी तथा प्रेससम्बन्धी स्थापित प्रक्रियाबाट समाधान खोज्न सकिने भन्दै पत्रकारलाई नै पक्राउ गरेर हिरासतमा राख्ने कार्य स्वीकार्य नहुने बताएका छन्।
प्रेस तथा अभिव्यक्ति स्वतन्त्रताको संवैधानिक अधिकारमाथि कुनै पनि प्रकारको हस्तक्षेप हुन नहुने भन्दै पत्रकार महासंघलगायतका संस्थाले सरकार र सुरक्षा निकायको ध्यानाकर्षण गराएका छन्। उनीहरूले पत्रकारलाई निर्भीक रूपमा समाचार लेख्ने र प्रकाशित गर्ने वातावरण बनाउनसमेत माग गरेका छन्।
चार दशकदेखि पत्रकारितामा सक्रिय श्रेष्ठको नेतृत्वमा रहेको जनआस्था मिडियाले तीन दशकभन्दा लामो समयदेखि विभिन्न राजनीतिक, प्रशासनिक तथा सार्वजनिक क्षेत्रमा हुने अनियमितता र गैरकानुनी गतिविधिलाई समाचारमार्फत उजागर गर्दै आएको छ। खोजी पत्रकारितालाई प्राथमिकता दिँदै आएको जनआस्थाले विगतमा पनि सत्ता र शक्तिमा रहेका व्यक्तिहरूका गतिविधिमाथि प्रश्न उठाउँदै आएको छ।
त्यसक्रममा श्रेष्ठ स्वयं पनि विभिन्न समय समाचारकै विषयलाई लिएर कानुनी तथा प्रशासनिक झमेलामा पर्दै आएका छन्। पछिल्लो पक्राउले भने मुलुकमा प्रेस स्वतन्त्रता र पत्रकारको सुरक्षाको विषयलाई पुनः बहसमा ल्याएको छ।
विश्व प्रेस काउन्सिलका वरिष्ठ उपाध्यक्षसमेत रहेका श्रेष्ठ प्रेस काउन्सिल नेपालका पूर्वअध्यक्ष तथा नेपाल पत्रकार महासंघका पूर्वमहासचिव हुन्। खोजी पत्रकारितामा लामो समयदेखि सक्रिय उनी निर्भीक र खरो पत्रकारका रूपमा परिचित छन्।
पत्रकारिता क्षेत्रले समाचारको विषयलाई लिएर सम्पादकलाई पक्राउ गर्ने शैलीले प्रेसमाथि डर र दबाबको वातावरण सिर्जना गर्न सक्ने भन्दै आपत्ति जनाएको छ। पत्रकारहरूले श्रेष्ठलाई तत्काल रिहा गरी समाचार प्रकाशनका विषयमा कानुनी प्रक्रिया भए त्यसलाई कानुनसम्मत ढंगले अघि बढाउन माग गरेका छन्।
श्रेष्ठको पक्राउसँगै प्रेस स्वतन्त्रताको पक्षमा पत्रकार तथा सञ्चारसम्बद्ध संघसंस्थाहरू एक ठाउँमा उभिएका छन्। उनीहरूले राज्यले आलोचना र प्रश्नलाई सहने लोकतान्त्रिक संस्कार विकास गर्नुपर्ने र सञ्चारमाध्यमलाई नियन्त्रण गर्नेभन्दा स्वतन्त्र पत्रकारिताको संरक्षण गर्नुपर्ने बताएका छन्।
विश्व प्रेस काउन्सिलका वरिष्ठ उपाध्यक्षसमेत रहेका श्रेष्ठ प्रेस काउन्सिल नेपालका पूर्व अध्यक्ष एवम् नेपाल पत्रकार महासंघका पूर्व महासचिव हुन् ।
