काठमाडौं । राष्ट्रिय स्वतन्त्र पार्टी (रास्वपा) ले नागरिकका गुनासा, समस्या तथा सुझाव प्रत्यक्ष रूपमा सुन्ने उद्देश्यले ‘हामी सुन्छौँ’ अभियान सञ्चालन गर्ने भएको छ।
पार्टीका सह–महामन्त्री हरि ढकालका अनुसार केन्द्रीय समितिको २०८३ साल श्रावण १३ गतेको निर्णयअनुसार आगामी श्रावण २५ गतेदेखि पार्टीको केन्द्रीय कार्यालय ‘घण्टीघर’बाट अभियान सुरु गरिनेछ।
अभियानअन्तर्गत नागरिकका गुनासा, समस्या तथा अमूल्य सुझाव प्रत्यक्ष रूपमा सुन्ने तथा तिनको सम्बोधनका लागि आवश्यक सहजीकरण गरिने जनाइएको छ।
यसका लागि प्रत्येक दिन पार्टीका केन्द्रीय सदस्य र प्रतिनिधिसभा सदस्यहरूमध्ये दुईजनाको नियमित उपस्थिति अनिवार्य गरिएको र हरेक दिन कम्तीमा एकजना प्रतिनिधिसभा सदस्य अनिवार्य रूपमा उपस्थित रहने व्यवस्था गरिएको पार्टीले जनाएको छ।
रास्वपाले अभियानमार्फत नागरिक र पार्टीबीचको प्रत्यक्ष संवादलाई थप प्रभावकारी बनाउँदै जनताका समस्या समाधानका लागि आवश्यक पहल गर्ने अपेक्षा गरेको छ।
