जापानी अर्बपति युसाकु माइजावा अन्तर्राष्ट्रिय अन्तरिक्ष स्टेशनमा १२ दिन बिताएपछि सोमबार पृथ्वीमा फर्किएको रुसी अन्तरिक्ष एजेन्सी रोस्कोसमोसले जनाएको छ । माइजावा एक फेसन टाइकुन हुन् जसले आफ्नो अनलाइन फेसन व्यवसाय जोजोलाई २०१९ मा सफ्टबैंकलाई बेचेका थिए। फोर्ब्सले उनको सम्पत्ति एक अर्ब ९० करोड अमेरिकी डलर रहेको अनुमान गरेको छ ।
यात्रा कस्तो रह्यो ?
माइजावाले आफ्ना सहायक तथा चलचित्र निर्माता योजो हिरानो र रुसी अन्तरिक्ष यात्री अलेक्जेण्डर मिसुरकिनका साथमा ग्रिनविच मिन टाइमअनुसार ०३१३ को योजनाबद्ध समयमा कजाकिस्तानको मैदानमा प्यारासुट गरेका थिए ।
अवतरणस्थल मध्य कजाकिस्तानको चेकाग्जानको १५० किलोमिटर दक्षिणपूर्वमा अवस्थित थियो । यहाँ वर्षा र उप–शून्य तापक्रम थियो । माइजावाले रुसी ‘सोयुज’ अन्तरिक्ष यानमा यो यात्रा गरेका हुन् । यो यात्रासँगै एक दशकभन्दा बढी अवधिमा अन्तर्राष्ट्रिय अन्तरिक्ष स्टेसनको यात्रा गर्ने उनी पहिलो अन्तरिक्ष यात्री बनेका छन् ।
यी उद्यमीले आफ्नो यात्राबाट सामाजिक सञ्जालमा कयौँ प्रकारका पोस्ट गरेका छन् जसमा चिबाको आफ्नो गृह प्रान्तको स्थानका तस्बिरहरु र शून्य गुरुत्वाकर्षणमा चिया बनाउने तरिका तथा ताजा अन्डरवेयरको कमीबारे चर्चा गरिएका भिडियो समावेश छन् ।
यात्राबारे माइजावाको भनाइ
आर्बिटिङ स्पेस स्टेसनबाट एक लाइभ अन्तरवार्तामा माइजावाले भनेका छन्, “एक पटक तपाईं अन्तरिक्षमा पुगेपछि यो अद्भुत अनुभव प्राप्त गरेर यसको मूल्य कति छ भन्ने महसुस गर्नुहुनेछ ।”
उनले यात्राका लागि ८ करोड अमेरिकी डलरभन्दा बढी तिरेका थिए भन्ने दावीका बारेमा सोधिएको प्रश्नमा उनले भने, “म सही राशि खुलाउन सक्तिन, तर ‘धेरै पैसा’ तिरेको थिएँ ।”
माइजावाले हाल सन् २०२३ मा चन्द्रमाको यात्रामा आफूसँग सामेल हुन आठ व्यक्तिको खोजी गरिरहेका छन् । यसका लागि आवदेकहरुले चिकित्सा परीक्षण र अन्तरवार्ता पास गर्न आवश्यक छ ।
