विराटनगर। कोशी प्रदेश प्रहरी कार्यालयले झापा, मोरङ र सुनसरी जिल्लाका विभिन्न स्थानबाट लागुऔषधसहित पाँच जनालाई पक्राउ गरी आवश्यक अनुसन्धान सुरु गरेको छ ।
इलाका प्रहरी कार्यालय काकँरभिट्टा र लागुऔषध नियन्त्रण ब्युरो काकँरभिट्टाको संयुक्त प्रहरी टोलीले झापाको अर्जुनधारा नगरपालिका-११ का २१ वर्षीय विवेक जबेगुलाई छ ग्राम ५०० मिलिग्राम लागुऔषध ब्राउनसुगर र प्र१-०१-०१३ प ५२ नं को मोटरसाइकलसहित नियन्त्रणमा लिएको कार्यालयका प्रवक्ता एवं वरिष्ठ प्रहरी उपरीक्षक योगेन्द्रसिंह थापाले जानकारी दिनुभयो ।
वडा प्रहरी कार्यालय भद्रपुर झापाले अर्जुनधारा-९ का २२ वर्षीय अरमान खानलाई दुई ग्राम चार मिलिग्राम ब्राउनसुगरसहित नियन्त्रणमा लिएको छ ।
यसैगरी, अस्थायी प्रहरीचौकी डाम्राभिट्टाले रतुवामाई नगरपालिका-८ का २९ वर्षीय मोहन बास्कीलाई २२० मिलिग्राम ब्राउनसुगर र प्रहरीचौकी रमाइलोले बेलबारी नगरपालिका-११ का २९ वर्षीय रणध्वज राईलाई छ ग्राम ३८० मिलिग्राम ब्राउनसुगर र प्र१-०२-०४४ प११८ नं को मोटरसाइकलसहित नियन्त्रणमा लिएको हो ।
प्रहरीचौकी नरसिंहटप्पु सुनसरीले साउन ९ गते साँझ धनकुटा-१ घर भई हाल इटहरी उपमहानगरपालिका-४ मा कोठा भाडामा बस्दै आएका ३५ वर्षीय मनबहादुर थापालाई १०८ ग्राम ३० मिलिग्राम ब्राउनसुगरसहित पक्राउ गरेको छ ।
पक्राउ परेका सबै जनाको सम्बन्धमा थप अनुसन्धान भइरहेको प्रवक्ता थापाले जानकारी दिनुभयो । रासस
