बागमती। जिल्ला प्रशासन कार्यालय मकवानपुरले स्क्यामर तथा अन्य अपराधीको निगरानीका लागि सरोकार भएका सबैलाई आग्रह गरेको छ ।
प्रशासनका तर्फबाट सहायक प्रमुख जिल्ला अधिकारी मोहनराज जोशीद्वारा आज जारी सूचनामा स्क्यामर (जालसाज गर्ने)ले भ्रममा पारी बैंक खातामा पैसा हाल्न लगाउनेजस्ता गतिविधि बढेकाले सचेत रही निगरानी गर्न आग्रह गरिएको हो ।
हेटौँडाका होटल तथा गेष्ट हाउसमा ग्राहकका रूपमा आएर अनलाइन किनमेल, अनलाइन जागिर, चिठ्ठा, व्यवसाय, बजार अनुसन्धान, उद्योगमा लगानी, होलसेल कारोबारलगायत नामको प्रलोभनमा पारी विभिन्न व्यक्तिबाट आफ्नो क्युआरमा वा नेपाल तथा भारतस्थित बैंक खातामा पैसा हाल्न लगाउने तथा अन्य विभिन्न उपायको प्रयोग गरी रकम छल्न ‘स्क्यामिङ’ गर्नेजस्ता घटनाको वृद्धि भइरहेकाले सचेत रहँदै निगरानी बढाउन सबैमा आग्रह गरिएको सहायक प्रमुख जिल्ला अधिकारी जोशीले बताउनुभयो ।
यस विषयमा पीडितको गुनासो आउने गरेको र त्यस्ता व्यक्तिले होटल तथा गेष्ट हाउसमा लामो समय बसेर होटल/गेष्ट हाउस सञ्चालकको फोन, सवारीसाधनको प्रयोग गरी विभिन्न व्यक्तिलाई जालझेल गरी ठग्ने गरेको पाइएकाले यस्तो कार्यलाई पूर्ण रूपमा निगरानी गर्न, शङ्कास्पद व्यक्तिको गतिविधिका बारेमा प्रहरीलाई खबर गर्न प्रशासनले आग्रह गरेको हो ।
त्यस्ता ठग तथा अपराधीको दैनिक/रात्रि गतिविधिका बारेमा होटल व्यवस्थापकसमेत जिम्मेवार रूपमा सचेत रहन जानकारी गराउँदै प्रशासनले कतै कसैले कुनै पनि नागरिकलाई यस विषयमा ठगी गर्ने मनसायले प्रयोग गरेको देखिएमा अवस्थामा तत्काल प्रहरीलाई खबर गर्न अनुरोध गरिएको छ । रासस
