काठमाडाैँ । प्रतिपक्ष दल श्रम संस्कृति पार्टीकी सांसद अम्बिकादेवी संग्रौलाले प्रधानमन्त्री बालेन्द्र साहले प्रतिनिधि सभा नियमावली उल्लंघन गरेको भन्दै आपत्ति जनाउनुभएको छ ।
बुधवारको प्रतिनिधि सभा बैठकमा बोल्दै उहाँले प्रधानमन्त्री र सत्तापक्षीय नेताहरूबाटै संसदीय मर्यादाको उपहास भएको टिप्पणी गर्नुभयो । सांसद संग्रौलाकाअनुसार मंगलवारको बैठकमा राष्ट्रिय प्रजातन्त्र पार्टी (राप्रपा) की सांसद खुश्बु ओलीले सम्बोधन गरिरहेको समयमा प्रधानमन्त्री साह र सत्तारुढ र दल राष्ट्रिय स्वतन्त्र पार्टी (रास्वपा) का सभापति रवि लामिछानेले नियमावलीको बर्खिलाप हुनेगरी सभाभित्र आवतजावत गर्नुभएको थियो ।
प्रतिनिधि सभा नियमावलीको नियम २० मा कुनैपनि सदस्यले बोलिरहेको समयमा सभामुख र ती सदस्यको बीचबाट हिँड्न नपाइने स्पष्ट व्यवस्था छ । उहाँले प्रधानमन्त्रीले विगतमा सीमासम्बन्धी दिएको अभिव्यक्तिप्रति पनि आलोचना गर्नुभयो । गत जेठ १७ गते सदनमा व्यक्त गरिएको सो अभिव्यक्ति राष्ट्रहित विपरीत रहेको दाबी गर्दै उहाँले सो कुरा नसच्याइएकोमा असन्तुष्टि व्यक्त गर्नुभयो । उहाँले नागरिकको जिउधनको सुरक्षा गर्नु राज्यको प्राथमिक दायित्व भएको स्मरण गराउनु भयो ।
दलित समुदायका गणेश नेपालीले आत्मदाह गर्नुपरेको दुःखद् घटनाको चर्चा गर्दै उहाँले सरकारको कार्यशैलीमाथि प्रश्न उठाउनु भयो । सरकारले आफूलाई ‘एक्सप्रेस वे’ मा हिँडेको दाबी गरे पनि त्यसको नकारात्मक असर र दुर्घटनाको मारमा सर्वसाधारण परिरहेको उहाँको तर्क थियो ।
सांसद संग्रौलाले विधिको शासन नै लोकतन्त्रको मूल आधार भएको उल्लेख गर्दै उहाँले सरकारलाई जिम्मेवार र नियमसंगत प्रश्तुत हुन आग्रह गर्नुभयो ।
