काठमाडौं । मुगुका २५ वर्षीय पठाओ चालक गणेश नेपालीको आत्मदाहपछि उपचारका क्रममा भएको निधनको घटनाले प्रतिनिधिसभामा समेत भावनात्मक वातावरण सिर्जना गरेको छ।
शुक्रबार बसेको प्रतिनिधिसभा बैठकमा विशेष समय लिएर बोल्न रोस्ट्रममा पुगेका गृहमन्त्री सुधन गुरुङ गणेश नेपालीको घटनाको प्रसंग उठाउने क्रममा भावुक बने। रोस्ट्रममा पुगेपछि केहीबेर मौन रहँदै आँसु थाम्न नसकेका उनी निर्धारित मन्तव्य नै राख्न नसकी बोल्दै नगरी आफ्नो आसनतर्फ फर्किएका थिए।
गणेश नेपालीले काठमाडौंको त्रिपुरेश्वरस्थित राहदानी विभाग अगाडि आफ्नै शरीरमा पेट्रोल छर्केर आत्मदाहको प्रयास गरेका थिए। शरीरको करिब ५५ प्रतिशत भाग जलेपछि उनको उपचार काठमाडौंस्थित वीर अस्पतालको बर्न उपचार केन्द्रमा भइरहेको थियो। उपचारकै क्रममा शुक्रबार उनको निधन भएको हो।
गणेश नेपालीको निधनपछि संसद्मा शोकको वातावरण बनेको छ भने घटनाको निष्पक्ष छानबिन तथा दोषीमाथि कारबाहीको माग विभिन्न राजनीतिक दलका सांसदहरूले उठाइरहेका छन्।
