काठमाडौं । काठमाडौंको गोकर्णेश्वर नगरपालिका–४ माकलबारीमा अक्सिजन ग्यास सिलिन्डर र फायर एक्स्टिङ्ग्विसर विस्फोट हुँदा एक पैदलयात्रीको मृत्यु भएको छ।
प्रहरीका अनुसार शुक्रबार बिहान करिब १०:२० बजे माकलबारीस्थित सडक खण्डमा सिन्धुपाल्चोकको पाँचपोखरी थाङपाल गाउँपालिकातर्फ जाँदै गरेको बा.प्र.०६–००१ झ ००१७ नम्बरको गाडीमा राखिएका दुई वटा फायर एक्स्टिङ्ग्विसर र एउटा सानो अक्सिजन ग्यास सिलिन्डर विस्फोट भएको हो।
उक्त गाडी पाँचपोखरी थाङपाल गाउँपालिका–४ का ४२ वर्षीय कृष्ण अधिकारीले चलाइरहेका थिए। पनौतीस्थित नवज्योति अक्सिजनबाट अक्सिजन सिलिन्डर र फायर एक्स्टिङ्ग्विसर लोड गरिएको गाडीले नेपाल मेडिकल कलेज पछाडि रहेको पञ्चकुमारी फार्मेसीबाट औषधिसमेत लिएर पाँचपोखरी प्राथमिक अस्पतालतर्फ जाँदै गरेको प्रहरीले जनाएको छ।
विस्फोटका क्रममा सडकमा पैदल हिँडिरहेका बागलुङ घर भई हाल गोकर्णेश्वर नगरपालिका–८ माकलबारी बस्दै आएका ४१ वर्षीय विष्णु थापा गम्भीर घाइते भएका थिए। उनलाई उपचारका लागि नेपाल मेडिकल कलेज, अत्तरखेल लैजाँदै गर्दा बाटोमै मृत्यु भएको प्रहरीले जनाएको छ।
प्रहरीका अनुसार बिहान १०:४६ बजे चिकित्सकले थापालाई मृत घोषणा गरेका हुन्। उनको शव हाल नेपाल मेडिकल कलेज, अत्तरखेलमा राखिएको छ।
घटनापछि चालक कृष्ण अधिकारी प्रहरीको सम्पर्कमा रहेका छन् भने सवारी साधन घटनास्थलमै राखिएको छ। घटनाबारे थप अनुसन्धान भइरहेको प्रहरीले जनाएको छ।
