काठमाडौं । स्विट्जरल्यान्डले अल्जेरियालाई २–० ले पराजित गर्दै विश्वकप फुटबलको अन्तिम १६ मा स्थान सुरक्षित गरेको छ।
पहिलो हाफमा एक गोलको अग्रता बनाएको स्विट्जरल्यान्डले दोस्रो हाफ सुरु भएको ४८ सेकेण्डमै दोस्रो गोल थप्यो। नटिङहम फरेस्टका खेलाडी डान एनडोएले गरेको गोलले स्विट्जरल्यान्डलाई बलियो अवस्थामा पुर्यायो।
खेलको ८१औँ मिनेटमा स्विट्जरल्यान्डसँग अग्रता अझ फराकिलो बनाउने उत्कृष्ट अवसर आएको थियो। तर फाबियन रिडरले नजिकबाट प्रहार गरेको बल अल्जेरियाका गोलरक्षकले बचाएपछि तेस्रो गोल हुन सकेन।
यस जितसँगै स्विट्जरल्यान्डले अन्तिम १६ मा कोलम्बिया र घानाबीच शनिबार हुने खेलको विजेतासँग प्रतिस्पर्धा गर्नेछ।
यता, अल्जेरियाको यात्रा अन्तिम ३२ बाटै टुंगिएको छ।
योसँगै अल्जेरिया अन्तिम ३२ बाट बाहिरिने पाँचौँ अफ्रिकी टोली बनेको छ। यसअघि दक्षिण अफ्रिका, आइभरी कोस्ट, डिआर कङ्गो र सेनेगल पनि यही चरणबाट बाहिरिएका थिए।
हालसम्म अन्तिम ३२ खेलेका अफ्रिकी टोलीमध्ये मोरक्को मात्र अन्तिम १६ मा पुग्न सफल भएको छ। अब केप भर्डे, इजिप्ट र घानाले अन्तिम ३२ का खेल खेल्न बाँकी छन् भने ट्युनिसिया समूह चरणबाटै बाहिरिएको थियो।
