काठमाडौं । राष्ट्रिय स्वतन्त्र पार्टी (रास्वपा) का महामन्त्री पदका उम्मेदवार मनिष झाले पार्टीभित्र गुटबन्दीको प्रयास भएको आरोप लगाउँदै त्यसमा संलग्नहरूलाई कारबाही गर्न सभापति रवि लामिछानेसँग आग्रह गरेका छन्।
शुक्रबार भरतपुरमा सञ्चारकर्मीसँग कुरा गर्दै झाले पार्टीले सार्वजनिक रूपमा अस्वीकार गर्दै आएको समूहगत अभ्यास महाधिवेशनकै क्रममा देखिएको भन्दै असन्तुष्टि व्यक्त गरे।
उनले लोकतान्त्रिक प्रक्रियामा उम्मेदवारबीच प्रतिस्पर्धा स्वाभाविक भए पनि संस्थापन पक्षबाट समूह बनाएर गरिएको अभ्यास पार्टी नेतृत्वकै भनाइविपरीत रहेको बताए।
झाले भने, “जे गर्नु हुँदैन भनेर भनिएको थियो, त्यही भइरहेको देखियो। डेमोक्रेटिक प्रोसेसमा समूहगत अभ्यास हुनु हाम्रो नेताकै अभिव्यक्तिविपरीत हो।”
उनले सभापति लामिछानेलाई लक्षित गर्दै, “यदि संस्थापन पक्ष एकजुट भएर गुटबन्दी गरिएको हो भने, यस्तो प्रयास गर्नेहरूलाई कारबाही गर्नुस्,” भन्ने आग्रह समेत गरे।
