काठमाडौँ। विश्व हिन्दू महासंघ नेपाल राष्ट्रिय समितिको आठौं महासभाबाट निर्विरोध निर्वाचित सभापति अरुणकुमार पाण्डेले बुधबार काठमाडौंको बाँसबारीस्थित केन्द्रीय कार्यालयमा पदभार ग्रहण गर्नुभएको छ ।
सो अवसरमा नवगठित केन्द्रीय कार्यसमितिको विस्तार तथा सामूहिक पदभार ग्रहण कार्यक्रम सम्पन्न भएको हो ।
कार्यक्रममा सभापति पाण्डेले महासंघका संस्थापक परिकल्पनाकार स्वर्गीय राजा वीरेन्द्र तथा राष्ट्रगुरु योगी नरहरिनाथको सालिकमा माल्यार्पण गर्नुभएको थियो ।
नवगठित कार्यसमितिमा उपसभापतिमा महेश्वर शर्मा पौडेल, ज्यो.पं. लेखनाथ न्यौपाने र अर्चना शर्मा, महासचिवमा उत्तमराज भण्डारी, कोषाध्यक्षमा ऋषिराम पोखरेल तथा केन्द्रीय सदस्यमा राष्ट्रिय समाचार समितिका सञ्चारकर्मी अर्चना झा सहित विभिन्न क्षेत्रका व्यक्तित्वहरू चयन हुनुभएको निर्वाचित सभापति अरुणकुमार पाण्डेले जानकारी गराउनु भएको छ ।
पाण्डेले २०३७ सालमा स्थापना भएको विश्व हिन्दू महासंघ हाल विश्वका ४३ देशमा राष्ट्रिय समिति रहेको अन्तर्राष्ट्रिय संस्था हो बताउनुभयो ।
त्यसैगरी उहाँले नवगठित कार्यसमितिले सनातन धर्मको संरक्षण, संगठन सुदृढीकरण तथा राष्ट्रिय–अन्तर्राष्ट्रिय स्तरमा महासंघको भूमिका थप प्रभावकारी बनाउने प्रतिबद्धता जनाएको भन्नुभयो ।
