काठमाडौँ । तेस्रोपटक म्याद थपका लागि बुधबार निवर्तमान सभामुख कृष्णबहादुर महरालाई अदालत लगिँदैछ । प्रहरीले अनुसन्धान पूरा नभएको भन्दै तेस्रोपटक म्याद थपका लागि अदालत लैजान थालेको हो ।
गत आइतबार जिल्ला अदालतले महरालाई पाँच दिन थुनामा राखेर अनुसन्धान गर्न अनुमति दिएको थियो । असोज २८ गते अदालतले महरालाई ३ दिन म्याद थप गरेको थियो । त्यसअघि दसैँ बिदामा अदालत बन्द रहेकोले प्रहरीले १० दिनसम्म महरालाई म्याद थपका लागि अदालत उपस्थित गराएको थिएन ।
फौजदारी मुद्दामा हिरासतमा लिएको २५ दिनभित्र अनुसन्धान सकेर अदालतमा अभियोगपत्र दायर गर्नुपर्छ । तर हालसम्म प्रहरीले यो मुद्दाबारे राय सुझावसहितको प्रतिवेदन सरकारी वकिलको कार्यालयमा पेश गरेको छैन । किटानी जाहेरी परेपछि महरा गत असोज १९ गते साँझ सभामुखको सरकारी निवास बालुवाटारबाट पक्राउ परेका थिए । महरामाथि संसद सचिवालयमा कार्यरत महिला कर्मचारीले आरोप लगाएकी हुन्। महराले आफूमाथि असोज १२ गते प्रयास गरेको भन्दै आरोप लगाउने महिलाले असोज १८ गते किटानी जाहेरी दिएकी थिइन् ।
त्यसपछि महरालाई प्रहरीले असोज १९ गते बेलुका सभामुख निवास बालुवाटारबाट पक्राउ गरेको थियो ।