इटालियन सिरी ‘ए’ फुटबलमा इन्टर मिलान बराबरीमा रोकिएको छ । शनिबार राति भएको खेलमा पर्मासँग २–२ गोलको बराबरीमा इन्टर रोकिएको हो । घरेलु मैदानमा एन्टोनियो कान्ड्रेभाले २३ औं मिनेटमा गोल गर्दै इन्टरको सुरुवाती अग्रता दिलाएको थियो । तर २६ औं मिनेटमा यान कारामोले गोल गर्दै पर्मालाई १–१ गोलको बराबरीमा फर्काएका थिए ।
खेलको ३० औं मिनेटमा गेर्भिन्होले गोल गर्दै पहिलो हाफमा पर्मालाई पुनः २–१ को अग्रता दिलाउन सफल भए । दोस्रो हाफमा इन्टरका लागि लुकाकु नायक बनी खेलको ५१ औं मिनेटमा गोल गर्दै इन्टरलाई हारबाट जोगाउन सफल भए ।
यो बराबरीसँगै इन्टरले लिगको शीर्ष स्थानमा उक्लने मौका गुमाएको छ । दोस्रो स्थानको इन्टरले ९ खेलमा २२ अंक जोडेको छ । १३ अंक जोडेको पर्मा लिगको छैटौं स्थानमा छ ।
