कप्तान लियोनल मेस्सी अर्जेन्टिनाको राष्ट्रिय फुटबल टिममा फर्किएका छन् । दक्षिण अमेरिकी फुटबल महासंघ (कोपा) को प्रतिबन्ध फुकुवा भएसँगै मेस्सी अर्जेन्टिनाको टिममा फर्किएका हुन् । यसैगरी अर्जेन्टिनाले ब्राजिल र उरुग्वेसँगको मैत्रीपूर्ण खेलका लागि घोषणा गरेको टिममा मेस्सी अटाएका छन् । मेस्सीलाई टिममा राख्दै मुख्य प्रशिक्षक लियोनल स्कालोनीले २६ सदस्सीय टिमको घोषणा गरेको छ ।
नोभेम्बर १५ मा ब्राजिल र नोभेम्बर १८ मा उरुग्वेसँग अर्जेन्टिनाले मैत्रीपूर्ण खेल खेल्दैछ । कोपा अमेरिकाले महासंघमाथि भ्रष्ट्राचारको आरोप लगाएपछि गत साउनमा मेस्सीमाथि तीन महिनाको प्रतिबन्ध लागेको थियो । ब्राजिलमा सम्पन्न कोपा अमेरिका अन्तर्गत तेस्रो स्थानका लागि भएको प्ले अफ खेल पश्चात मेस्सीले भ्रष्ट्राचारको आरोप लगाएका थिए । तेस्रो स्थानको पदक लिन समेत मेस्सीले अस्विकार गरेका थिए ।
कोपामा सेमिफाइनलमा ब्राजिलसँग २–० ले पराजित हुदै अर्जेन्टिना उपाधि होडबाट बाहिरिएको थियो । मेस्सीले सो खेलमा ब्राजिललाई उपाधि जिताउन रेफ्रीले खेल मिलेमतो गरेको आरोप लगाएका थिए । प्रतिबन्धका कारण अर्जेन्टिनी कप्तानले चिली, मेक्सिको इक्वेडर र जर्मनीविरुद्धको मैत्रीपूर्ण खेल गुमाएका थिए ।
