जर्मन क्लब वायर्न म्युनिखका मुख्य प्रशिक्षक निको कोभाकले मुख्य प्रशिक्षकबाट राजीनामा दिएका छन् । साविक विजेता समेत रहेको वायर्नले शनिबार राति लज्जास्पद हार व्यहोरेपछि कोभाकले पद छाडेका हुन् । वायर्नका अनुसार कोभाकले क्लबसँगको सहमतिमा पद छाडेका हुन् ।
लिग अन्तर्गत शनिबार फ्रान्कफर्टसँग ५–१ को हार वायर्नले व्यहोरेको थियो । र, वायर्न लिगको चौथो स्थानमा झरेको थियो । वायर्नका पूर्व मिडफिल्डर समेत रहेका कोभाकले १८ महिना अघि क्लब सम्हालेका थिए ।
क्रोएसियण मिडफिल्डर कोभाकले गत सिजन वायर्नलाई बुन्डेस लिगा उपाधि दिलाएका थिए । उनको नेतृत्वमा वायर्नले ६५ खेलमा ४५ जित निकालेको छ ।
