ईङ्लिस प्रिमियर लिग फुटबलमा टोटेनहमले निराशाजनक बराबरी खेलेको छ । आईतबार राति भएको खेलमा एभर्टनसंग १–१ गोलको बराबरी टोटेनहमले खेलेको हो । खेलको ९७ औ मिनेटमा सेन तोसुनले हेडमार्फत गोल गर्दै टोटनहमलाई अंक बाँड्न बाध्य बनाए । तर एभर्टनका आन्द्रे गोमेज गम्भिर चोट बोक्दै मैदान बाहिरिएपछि खेलको नतिजा छाँयामा पर्यो ।
ह्यारी केनको अनुपस्थितीमा खेलको ६३ औ मिनेटमा डेली अलीले टोटेनहमलाई अग्रता दिलाएका थिए । तर माउरिसियो पोचिटिनोको क्लबले अग्रतालाई जोगाउन असफल रह्यो । सन ह्युङ मिनको खराब ट्याकलका कारण गोमेज खुट्टामा गम्भिर चोट बोक्न बाध्य भएका थिए । ७९ औ मिनेटमा सन ह्युङले रातो कार्ड समेत खादै मैदान बाहिरिए ।
टोटेनहमले बाँकी समय १० खेलाडीमा सिमित रहेर खेलको अन्त्य गरेको थियो । टोटेनहम १३ अंक सहित तालिकाको ११ औ स्थानमा छ । एभर्टन ११ अंक जोड्दै रेलिगेशन जोनभन्दा एक स्थान माथि छ ।
