काठमाडौं । सरकारले संघीय संसद्मा पेश गरेको आर्थिक सर्वेक्षण २०८२/८३ ले नेपालमा सवारी साधनको संख्या उल्लेख्य रूपमा बढिरहेको देखाएको छ। विशेषगरी दुईपांग्रे सवारीसाधनको दर्ता तीव्र रूपमा वृद्धि भएको तथ्यांकले देखाएको हो।
अर्थमन्त्री डा. स्वर्णिम वाग्लेले संघीय संसद्मा प्रस्तुत गरेको आर्थिक सर्वेक्षणअनुसार चालु आर्थिक वर्ष २०८२/८३ को फागुनसम्म बस, मिनिबस, ट्रक, माइक्रोबस, कार तथा मोटरसाइकलसहित कुल २ लाख ८१ हजार ९ सय २१ सवारी साधन दर्ता भएका छन्।
यससँगै देशभर दर्ता भएका कुल सवारी साधनको संख्या ६२ लाख ४९ हजार ७ सय ३२ पुगेको छ। दर्ता भएका सवारी साधनमध्ये ५० लाखभन्दा बढी मोटरसाइकल रहेको तथ्यांकले देखाएको छ।
सवारी साधनको संख्या निरन्तर बढ्दै जाँदा यातायात व्यवस्थापन, सडक पूर्वाधार विस्तार तथा ट्राफिक प्रणाली सुधारको आवश्यकता अझै बढेको देखिन्छ।
त्यस्तै, चालु आर्थिक वर्षको फागुनसम्म देशभर ४३ हजार ७ सय ५० थान सवारी चालक अनुमतिपत्र (स्मार्ट कार्ड) वितरण गरिएको छ। हालसम्म वितरण भएका स्मार्ट लाइसेन्सको कुल संख्या ४१ लाख १४ हजार १ सय ८१ पुगेको छ।
यातायात व्यवस्था विभागका अनुसार सोही अवधिमा ८७ हजार १४ थान इम्बोस्ड नम्बर प्लेट उत्पादन गरिएको भए पनि केवल ५ हजार १ सय ८६ थान मात्र जडान गरिएको छ। हालसम्म कुल ८ लाख ३१ हजार ५९ थान इम्बोस्ड नम्बर प्लेट उत्पादन भए पनि ८८ हजार ३ सय ४० थान मात्र जडान भएका छन्।
विभागले इम्बोस्ड नम्बर प्लेट जडान प्रक्रियालाई थप सरल, व्यवस्थित र प्रभावकारी बनाउन ‘इम्बोस्ड सवारी नम्बर प्लेट जडान सम्बन्धी निर्देशिका, २०८१’ स्वीकृत गरी कार्यान्वयनमा ल्याइएको जनाएको छ।
