लियोनल मेस्सीको ह्याट्रिकमा बार्सिलोना स्पेनिस लिगको शीर्ष स्थानमा उक्लिएको छ । शनिबार राति भएको खेलमा सेल्टा भिगोलाई ४–१ गोल अन्तरले बार्सिलोनाले हराएको हो । पेनाल्टीमा एक र फ्रिकिकमार्फत दुई जादुमय गोल गर्दै मेस्सीले ह्याट्रिक पुरा गरेका हुन् । खेलको २३ औ मिनेटमा पेनाल्टीमार्फत गोल गर्दै मेस्सीले बार्सिलोनालाई अघि बढाएका थिए ।
पाहुना टोली सेल्टा भिगोका ओलाजाले ४२ औ मिनेटमा खेल बराबरीमा ल्याएका थिए । तर पहिलो हाफको ईन्जुरी समयमा गोेल गर्दै मेस्सीले पुन बार्सिलोनालाई अग्रता दिलाएका थिए । मेस्सीले ४८ औ मिनेटमा ह्याट्रिक पुरा गर्दै बार्सिलोनालाई ३–१ ले अघि बढाएका थिए । ८५ औ मिनेटमा सर्जियो बुस्केटले गोल गर्दै बार्सिलोनाको लागी जित सुनिश्चित गराएका थिए ।
शीर्ष स्थानको बार्सिलोनाले १२ खेलबाट २५ अंक जोड्यो । दोस्रो स्थानको रियल मड्रिडसंग समान अंक भएपनि गोल अन्तरका आधारमा शीर्ष स्थानमा रह्यो । सेल्टा भिगो ९ अंक सहित रेलिगेशन जोनमै छ ।
