काठमाडौँ। नेकपा (एमाले) का उपमहासचिव लेखराज भट्टले पार्टीभित्र नेतृत्व परिवर्तनको कुनै सम्भावना नरहेको स्पष्ट पार्नुभएको छ ।
शनिवार भक्तपुरको गुण्डुस्थित पार्टी अध्यक्ष केपी शर्मा ओलीको निवासमा बसेको सचिवालय बैठकपछि सञ्चारकर्मीहरूसँग कुरा गर्दै भट्टले यस्तो बताउनुभएको हो ।
बैठकमा भएका छलफलका विषयमा जानकारी दिँदै उपमहासचिव भट्टले बाहिर आएका नेतृत्व परिवर्तन र राजीनामाका कुराहरूलाई ‘अतिरञ्जित’ संज्ञा दिनुभयो ।
शनिवारको बैठकमा महासचिव, तीनजना उपमहासचिव र पाँचजना सचिवहरूले पार्टीको आन्तरिक अवस्था र आफ्ना अनुभवहरूका बारेमा धारणा राखेका थिए ।
बाँकी रहेका चारजना सचिवहरूले आईतवार बिहान साढे ११ बजे बस्ने बैठकमा आफ्नो प्रश्तुति दिने कार्यक्रम छ । उपमहासचिव भट्टकाअनुसार बैठकका लागि ११ वटा कार्यसूची (एजेण्डा) प्रश्तावित छन् ।
जसमा कार्यविभाजन, विभिन्न कार्यदल गठन र समसामयिक राजनीतिक प्रस्तावहरू समेटिएका छन्। आईतवार सचिवहरूको भनाइ सकिएपछि अध्यक्ष ओलीले बैठकमा उठेका प्रश्नहरूको जवाफ दिँदै निर्देशनात्मक मन्तव्य राख्नुहुनेछ ।
पार्टीको आन्तरिक अनुशासन र पद्धतिको चर्चा गर्दै भट्टले बैठकमा आफ्ना कुराहरू स्पष्ट र खुल्ला रूपमा राख्ने वातावरण रहेको बताउनु भयो ।
उहाँले भन्नुभयो, ‘पार्टीभित्र नेतृत्वको कमी–कमजोरीका विषयमा समीक्षा हुनु स्वाभाविक हो, तर अहिले नेतृत्व परिवर्तनको कुरा कसैले उठाएको छैन । अध्यक्षकै नेतृत्वमा विद्यमान समस्याहरूको समाधान गर्दै उहाँकै कमाण्डमा पार्टी एकताबद्ध भएर अघि बढ्नुपर्छ भन्ने नै सबैको साझा निष्कर्ष छ ।
पार्टीभित्रका कमी–कमजोरीलाई सच्याएर एकमना एकताका साथ अगाडि बढ्नुपर्छ । देशको वर्तमान संकटविरुद्ध पार्टी एकतावद्ध हुनुपर्ने र तल्लो तहका कार्यकर्तामा देखिएको उदासीनतालाई ऊर्जामा बदल्नुपर्नेमा सबै नेताहरूको एकरुपता रहेको छ ।’
अध्यक्ष ओलीले बैठकमा सबै नेताहरूलाई आफ्ना धारणा स्पष्टसँग राख्न प्रोत्साहित गर्नुभएको र बैठक सकारात्मक दिशामा अघि बढिरहेको भट्टले जानकारी दिनुभयो ।–न्युज एजेन्सी नेपाल
