काठमाडौं । बंगलादेशमा जारी एसियन भलिबल कन्फेडेरेसन (एभिसी) सेन्ट्रल जोन सिनियर महिला भलिबल च्याम्पियनसिपको दोस्रो खेलमा नेपालले आज (सोमबार) बलियो टिम कीर्गिस्तानसँग खेल्दैछ । ढाकामा जारी प्रतियोगिताको पहिलो खेलमा जित निकाली सकेको नेपालले दोस्रो खेलमा बलियो प्रतिद्वन्दीको सामना गर्न लागेको हो । खेल नेपाली समय अनुसार १२ः४५ मा सुरु हुनेछ ।
शहीद सुहरावर्दी ईन्डोर स्टेडियममा नेपालले कीर्गिस्तानलाई हराउँदै लगातार दोस्रो जितको खोजीमा हुनेछ । नेपालले पहिलो खेलमा अफगानिस्तानलाई ३० को सोझो सेटमा पराजित गरेको थियो । तर, बलियो किर्गीस्तानविरुद्ध नेपाललाई जित निकाल्न निकै मेहेनत गर्नु पर्नेछ । किर्गीस्तान पहिलो जितको खोजीमा हुनेछ । पहिलो खेलमा किर्गीस्तान माल्दिभ्ससँग पराजित भएको थियो ।
किर्गीस्तानपछि नेपालले मंगलबार आयोजक बंगलादेश र अन्तिम खेलमा नेपालले बुधबार माल्दिभ्सको सामना गर्नेछ । राउण्ड रोबिन लिगका आधारमा सञ्चालन हुने प्रतियोगिताको शीर्ष दुई टिम उपाधिका लागि प्रतिस्पर्धा गर्नेछन् । तेस्रो र चौथो हुने टिमले तेस्रो र चौथो स्थान हासिलका लागि पुन प्रतिस्पर्धा गर्नेछन् ।
